《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 何去何從
我由出世到依加… 第一次感到如此無助。
「踏踏踏踏踏踏────────」
當你望到人海茫茫般嘅人群一湧而至， 不期然就想到自己嘅渺小。 依一刻， 就好似金鐘地鐵站入面， 無數乘客嘅月台處， 一群又一群嘅人瘋湧而上。
「踏踏踏踏踏踏踏踏─────────」
只係， 乘客們早已變為瘋狂嘅喪屍。 而佢哋嘅目標， 只係眼前嘅人類。
佢哋嘅目的？ 哈哈！ 我… 根本一無所知。
係， 做人做係咁無奈。 此世上總有令人想不透嘅事， 亦有平凡人猜不透嘅真相。
喪屍四周皆是， 眾人卻如夕陽般漸殘漸弱， 向前有喪屍， 向後亦有喪屍。 退無可退， 唯一嘅出路只有身後鎖上嘅一扇門。
由離開火車站開始， 我哋早已走上末路。
屍殘末路。
連發生咩事都無從得知， 就要完結了嗎？ 我到底做咗啲咩？ 一無所長嘅平凡人， 能夠不平凡咁死去， 也許可能係天意。 留喺呢一個周圍都係喪屍嘅地方， 每一刻都生死未卜， 我哋與死又有咩分別？
剛才內心嘅強大意志已經離我而去， 當一個人失去鬥志， 只會不住跌倒。
而一跌， 就會一落千丈。
係恐懼使我軟弱， 定係本性如此， 天意難違？
絕境中， 有人會放棄， 有人會不甘心， 但亦總有人會…
絕。處。逄。生。
權哥眼中光芒一閃， 向側方跨了一步， 避開了喪屍嘅抓擊路線， 然後兩步已衝至那張開雙手嘅女喪屍面前， 輕鬆由佢嘅口中奪回防暴警棍， 然後反手一揮， 用警棍重重地砸喺年輕女喪屍嘅鼻樑上， 將佢本來十分挺拔嘅鼻子徹底打凹入臉部。
藉著呢一下嘅空隙同反衝力， 陳晉拔出背後嘅手槍， 然後馬上拉一拉， 再次舉起槍管， 卻無開槍， 只喺用槍柄砸喺快將穿過權哥嘅喪屍後背上面， 大力將他砸得立刻跌喺地上， 喪屍喉嚨入面咔咔咁吼叫， 聲音變異下叫聲更加詭異！
我精神好難集中， 雙眼看到嘅事物亦都無法集中。 只係覺得眼前一花，前面兩隻喪屍就已經倒喺地上， 再無爬返起身。
睇黎， 天不絕我， 命不該絕！
權哥以一敵眾， 毫無花巧功夫， 拳拳腳腳都將力量發洩喺喪屍身上！
「吼── 吼吼啊啊啊啊啊啊啊啊啊啊啊！！！！」
前方仲有三隻喪屍跑黎， 權哥見軒少已經走到門個邊， 佢立刻就舉起棍， 由左至右用力一揮打向帶住藍帽子嘅喪屍頭上， 喪屍被打之後卻伸出雙手揮向權哥！ 看似就要捉到佢時， 權哥退後一步， 揮向喪屍嘅右腹！ 喪屍被權哥嘅力度打到彎起腰， 見機權哥馬上再向佢個頭揮多一棍！
「吼啊啊啊啊啊啊！！」
「啪！！」
「唰唰──」 喪屍個頭噴出一條血柱， 整個身軀向後跌， 並無再爬起身。
「吼啊啊啊啊啊啊啊啊啊！！」
我企喺權哥身後警戒住， 走廊邊再跑黎兩隻喪屍！
「有退路未！」 權哥稍稍回氣， 盯睛望實走廊！
「我出盡力啦！ 就快開到！」 軒少蹲喺門前， 背影努力地晃動。
「盡快！」
「呀！！！！」 海晴突然大聲尖叫！
既然天未絕我退路， 我亦不會愚昧到反抗上天， 只好順從天意！
我回頭守住後方！ 身後剛才被擊倒嘅女喪屍衝到海晴身前， 我回過神黎已經只見女喪屍嘅背脊！
「海晴！！ 我係到！」 我馬上跑去女喪屍背後！ 高過隻喪屍嘅我諗都無諗馬上用手箍住佢條頸， 唔比佢撲向海晴！ 我右手順勢將刀插入喪屍喉嚨， 用力一割， 再用力拉動刀刃， 希望插得更深， 切得更多。
「呃啊啊……」
「唰唰──」
喪屍無再掙扎， 然後我將屍體慢慢放低。
我望向防火門嘅方向， 剛才仲剩低一隻被擊退嘅喪屍！ 呢個時候亦跑到我眼前！
「吼啊啊啊啊啊啊啊啊！！！！！」
手心傳黎異樣觸感， 海晴不知何時將防暴警棍交到我手中， 我拎起棍擺好姿勢， 準備打向喪屍到！
五米嘅距離一瞬即到， 我瞄準喪屍下巴， 雙手用力一揮擊向喪屍！
「吼啊啊啊吼啊啊！」
喪屍被我一擊後只係稍微低頭， 襯住呢一剎空隙我馬上不停揮棍打向佢頭部， 再喺佢想撲黎之際踢佢心口， 將佢踢倒喺地！
「軒少！ 得未呀！」
「搞掂！」 呯一聲， 門被大力推開。
「入面無屍！ 快啲入黎！」
我回頭望一望， 軒少果然已經打開咗道門！ 門後一片黑漆， 軒少嘅身影好快就消失咗。
但我並無就此收手嘅打算。 我先係將倒喺地上爬動嘅喪屍用腳踩實， 再轉翻個身，然後用警棍狠狠砸下， 將佢嘅鼻子徹底地打爛， 隨後再走到喪屍身邊， 用刀割斷佢嘅喉嚨。
我將已有少許變形嘅電筒掉喺地上， 不過小刀仍未離手。 我並唔會耐心咁等待， 等待直到地上翻來滾去嘅兩隻喪屍終於能夠重整自己， 然後再度掙紮住歪歪斜斜般重新企起身為止， 接著再度撕殺我哋。
我一定唔會！
一切， 我做得有條不紊， 不急不忙， 因為我明白慌亂只會為自己帶黎更多麻煩， 亦可能是我已經看穿如何在此喪屍末世生還， 因此心境亦步亦趨至漫不經心。
「吱呀──」
「門！ 門開咗啦！」 海晴驚喜地叫道， 雙手一抖就跟軒少走入去。
「快！ 快走入黎！」 軒少向抵抗喪屍嘅權哥與陳晉叫道， 我亦都快步走入房間。
「o靚妹你去搵野準備頂門！」 我同軒少支援權哥同陳晉退後， 邊踢邊跑後， 房間已經近在咫尺！
「唰──唰──」
與此同時呢一邊， 我哋依然用盡全力擊退喪屍， 終於慢慢地退入房間內！
「閂門！」
我哋用力一推， 門就應聲合上， 而海晴亦推黎一個木櫃， 喺軒少幫忙下， 呯一聲就堵塞上門口， 只不過並無聽到熟悉嘅關門聲！
只剩喪屍血淋淋嘅雙手卡喺門縫， 不停蠕動嘅手掌想拉開門！
陳晉撿起警棍， 不停用力打向喪屍手， 再用力向一隻手掌插去， 希望推走佢哋令我哋可以閂門！ 但時間無多！ 我感覺到背靠住嘅門又再傳黎突然嘅撞擊， 身後嘅力度再次加大！
「讓開！」 權哥搶過刀， 走去門邊拉實一隻手掌， 喪屍嘅手猶如觸電般， 當正權哥嘅大手係救命稻草一樣， 馬上用力抓實權哥隻手！ 權哥見狀馬上拉緊喪屍隻手， 用力將刀斬向喪屍手腕！
「吼啊啊啊啊啊啊啊啊！！！！」
暗紅色嘅血馬上噴灑出黎， 但我估刀鋒只喺切入皮肉， 由於房間入面太黑， 只能依靠門縫沙入嘅少許光芒同陳晉枝電筒。 但明顯地第一下唔成功， 但權哥繼續斬繼續斬， 手掌終於躂一聲跌咗落地！
「唯有爬上通風口！ 無其他路！」 軒少指向房間中央後方嘅通風口， 然後再大叫，
「差佬上去先！」 陳晉一言不發就跳起拉開通風口， 摸上邊緣就一躍而去爬上去。
「o靚妹過黎！」 軒少彎低腰讓出膝頭， 曲起如樓梯一樣等待海晴踩上去， 而佢上方正好有一個拉開咗出口！
「到你！ 細路快！」
權哥依然盡全力擋住不停推開嘅門， 但講真我覺得佢頂唔到幾耐！
軒少似係明白我心中嘅顧慮， 馬上跑上黎拉我過去， 同時大聲罵我， 「你再係到只會阻手阻腳， 明就彈上去！」 我望向海晴白晢嘅手腕， 稍一猶豫就捉實佢嘅手， 再被軒少推我上去。
軒少推完我上去後， 大叫道， 「你地行住先， 我同佢好快到！」 之後即刻走向房間黑暗嘅角落。
我有啲猶豫， 但係我記起有人曾經講過， 要想對付喪屍， 只有一個團隊先會有效， 獨自一人並唔能夠戰勝人數眾多嘅喪屍。 而我連自行跳上通風口都做不到， 為免拖累權哥軒少， 我決定跟上海晴。
海晴焦急地凝視著我， 手掌卻始終未有離去， 堅定地伸在我眼前。 我不再猶豫地握起海晴嘅手， 共同一起走向未知嘅未來， 前路到底會帶領我哋， 前去何處？