[惡搞無極限] 就係咁，我同幾個豬朋上左大陸獵金: １３　清脆既爆玻璃聲

我真係無諗過，打過邊爐姐，為左一碟魚蛋搞到開拖，而最緊要係本身講數既目的，同今次開拖原全無關聯，怨就怨你地阻住阿欣佢食魚蛋啦。

而我最諗唔到，係阿欣佢真係講得出做得到，真係當有人開聲佢就飛個樽過去，仲要係下下準，下下中果隻，我都唔知佢呢種神技係邊度練返黎。 

講返個現場情況先，我見到咁緊係一早搵地方收埋自己啦，但同時間大排檔Ｄ伙計都做緊同樣既野，而佢地既眼光都慢慢從阿欣既身上面，投射到我個身上。 

我發現，我真係好識得睇人地打既眼色。 

（喂，哥仔，條女係你架？） 





（係啊。） 

（咁你仲唔快Ｄ搞店你條女。） 

（我夠想啦，得先得架。） 

（你咁撚無用，都唔撚係男人黎。）

不約而同既目光都傳送緊呢個ＭＳＧ　比我。 





你估我想架，你試下同佢拍拖，你就知佢有幾爆。 

「仆你個街！妳夠拿ＷＯ！」我認得呢把聲係個紅毛既，然後，又一下好清脆既爆玻璃聲。 

「我就睇妳……」「鏘！」

「……仲有……」「鏘！」

「……幾多個⋯⋯」「鏘！」





「……可以爆……」「鏘！」

「……頂妳個肺……」「鏘！」

「……嗯。」「鏘！」

計落呢條紅毛比阿欣爆左８次樽，阿欣又係既，人地「嗯」左一聲妳就當聽唔到做好心唔爆人地啦，人地而家傷得咁重，都唔知佢個頭Ｄ紅色係佢染成咁定係血拿陰公。