[惡搞無極限] 就係咁，我同幾個豬朋上左大陸獵金: ３２　犯賤

我坐住舅父部車，抱住自己個袋，望住車外面既街境，一盞盞街燈劃過。 

諗返果一晚，因為一碟魚蛋，辣㷫左人地個字頭，仲要係完住唔關我事既，到比人放左條片上ＴＨＩＳＡＶ，到而家要著草。 

短短三日，就可以發生咁多野，世事真係好無常，係而家呢一刻，我竟然有少少掛住阿欣，唔知佢有無事呢，雖然我要著草呢件事係佢搞出黎，但人點都係有感情既動物。 

我成程車粒聲都無出，而舅父都好識做無主動講任何野。 

佢開左收音機，播緊既係「雙截棍」，咁岩去到播歌果環節。 





播緊既歌，頂！係未串緊我啊！ 

佢而家播緊陳小春果首「犯賤」囉！ 

好似串９緊我幫阿欣頂晒成件事咁啊！！！ 

而舅父無出聲咁耐，終於都忍唔住要開口，佢跟住收音機播緊果隻歌，開始陳小春上身咁係度唱。 

「對！我犯賤　被流放　也像樂園　別勸我我自願　未能半場棄權　別理我　我犯賤　若離去　戲就做完別救我　我自願　並無怨言～」





我望住唱到入晒神既舅父，再ＲＥＰＥＡＴ左次咁入骨既歌詞，掛住阿欣既情緒完全無晒。