[惡搞無極限] 就係咁，我同幾個豬朋上左大陸獵金: ３８　終於開船

聽左個老坑廢ＵＰ左三個字之後，佢終於開著左個引驚，而果兩個怒漢就入左隻大飛船頭既倉仔度。 

我見住佢地食住煙咁入去，極度擔心，所以上前去問個老坑：「佢地食住煙入去無事架咩？」 

「咁佢地買左『頭等』，坐入去正常啊，而且入面係吸煙區，岩晒佢地。」個老坑望都唔望我就答左。 

我聽到老坑既說話後，好奇又問：「入面係『頭等』！？我頭先見住個著草小姐入左去，以為係員工休息室咋ＷＯ。」 

「哈哈哈，呢位哥仔你真係好想像力，我架船咁細點會有員工休息室架。」 





我好想像力，我諗老坑先生你想像力應該勁過我ＷＯ。 

就係我仲想問個老坑野之際，果兩名成日自言自語既中坑，企係我後面，一齊話：「先生，你企左我個位啊。」 

老坑聽到都附和左句，「係啊哥仔，呢度係『商務』位，你返去你個『經濟』位先啦。」 

我望一望果兩位中坑，好唔好意思咁去返紅毛旁邊。 

「ＯＮ９仔，都話你廢架啦。」 





我望左望紅毛，但係比佢啤返轉頭，我又好鵪春望向其他方向。 

咁人地第一次著草，緊張又驚，唔識就問好正常姐。 

但正當我諗住成程船都扮啞仔之際，個紅毛竟然開口講：「你放心啦，我地坐既『經濟』位係著草最好既位置，好安全返到上去架。」 

我聽到紅毛呢句都安心Ｄ。 

「但係上到去後先再慢慢同你計。」





其實阿紅毛先生，你其實想同我計Ｄ咩呢？