[惡搞無極限] 就係咁，我同幾個豬朋上左大陸獵金: ８４　漫長的一晚

「究竟頭先發生左咩事？」我問阿俊。 

「點知啊，我沖完個涼返房，諗住上床訓覺果陣，就比人從後爆樽，我連爆我樽果條友係咩樣我都見唔清。」

「但我有Ｄ唔明，果次我條女爆你咁多次樽你都仲可以搵人黎覆桌，但今次一下就ＫＯ到你？」 

阿俊聽完我咁講後，啤住我話：「你係未而家呢個時侯串我先？」 

「唔敢唔敢……」我以笑黎沖淡現在尷尬既氣氛。 





勞斯萊斯又頭先到而家都無咩點講野，佢只係好靜咁幫阿俊包緊個頭，睇黎佢好多野諗緊。 

果一晚，我地係勞斯萊斯度過，阿俊訓勞斯萊斯張床，而我成晚就訓唔著，坐左係窗邊望住個夜空。 

「擔心？」勞斯萊斯問訓唔著既我，而我點一點頭。 

「唔好擔心咁多，辦法一定會諗到。」勞斯萊斯安慰我講：「橫店訓唔著，不如講下你Ｄ野我知，當分散注意力都好。」 

而家呢個情況下，都係一個幾好既話當年時候，我又由果晚打邊爐既事，講到著草，勞斯萊斯一路聽一路笑。 





講到咁上下，勞斯萊斯問我：「你戴住個條鏈咀，好熟好似係邊度見過。」 

聽到佢咁講後，我打開左個鏈咀，比左入面個地址佢睇，但佢話個地址係好耐之前，呢幾十年大陸轉變得咁快，可能而家果個地方已經唔同晒。

而且我仲講左我阿爸Ｄ野，好似佢留左批金係大陸比我呢Ｄ事。 

但估唔到既係，阿俊原來一直都無訓到，佢係旁邊偷聽緊我所講既野……