[惡搞無極限] 就係咁，我同幾個豬朋上左大陸獵金: １０３ 淘寶真係咩都有得買
所有事都準備好， 而阿倫都應該大既知道架車點揸。
阿輝就拎住部電話，就講：「而家佢地話個四本回鄉證Status 係『待配貨』。」
我地三個聽到後都唔係好知佢UP咩，所以我問：「呢個Status 係點解？」
「姐係話個淘寶賣家準備送件野去順豐度囉。」阿輝答。
喔～原來係咁，在下真係孤陋寡聞⋯⋯等等！
「你頭先講咩話！？」
「賣家準備送件野去順豐度啊。」
「前少少。」
「淘寶囉。」
咩話！？佢放左我地四個本回鄉證上淘寶比人買！？呢D咁新穎既方法我真係估佢唔到。
阿俊同阿倫聽到後笑到仆街，而我就拎左部電話過黎睇，原來剛剛果位哥仔講緊可以CHECK到四本回鄉證送到去邊，就係淘寶個App，我再睇真D⋯⋯唔係嘛買四本回鄉證50人仔咁平。
「大陸D古惑仔諗法都幾創新架WO。」
我都無奈笑左幾聲，你地係唔會知道自己既證件比人放左上網賣，仲要賣個咁既價錢果種心情係點。
「睇完未啊，快快手拎部電話黎啦，我要用果位哥仔講果個語音地圖啊。」