[惡搞無極限] 就係咁，我同幾個豬朋上左大陸獵金: １４３　真係起飛拿……

坐住呢架咁瘋狂既車，我地就只有不停咁祈禱，祈求時興隆手車唔好有事，我地就平安無事。就係我地咁驚之際，我再望一望坐係司機位既阿俊，佢咩動靜都無……古惑仔果然後古惑仔，見慣大場面既佢係而家呢個時刻竟然可以咁冷靜。

「阿俊你真係勁……」我呢句其實未講晒，係仲想講落去果陣，我諗住伸個頭上前，點知見到原來阿俊已經嘔晒白泡暈左。

「坐好啦你個仆街！伸個死人頭上黎阻閪住阿姐揸車架知唔知啊！」時興隆見到我伸個頭上黎，就小爆我，然後就一拳打左上我塊面度。

呢一拳，打到我滿天星。

就係呢個時候，奇蹟又出現了。





「屌！唔閪係啊！」我只係聽到時興隆不燥底咁狂打方向盤，根本唔知咩事，「邊個仆街上次用完架車唔記得打油啊！」

哦，原來係架車無油……睇來呢個係神既打救。

但通常奇蹟發生前，總要面對一個危機，唔係果Ｄ就唔叫做奇蹟。

就好似我頭先咁講，我地架ＶＡＮ仔係行緊一條對頭車迎面衝黎果條線，而如果要轉去旁邊果條線其實都有Ｄ難度，因為中間隔住左一個都幾闊下既花甫……雖然種果Ｄ花大多數都死晒，但都可以算係花甫啦。

係我仲望住呢個花甫之際，我發現，點解我地架車愈來愈近個花甫既？等等！唔只近！係已經剷撚左上去！





時興隆因為睇到對面線有個加油站，衝左上個花甫到諗住轉線，而因為個花甫既設計係有個斜斜地既石壆。係一個唔符合物理定律既情形下，我地既ＶＡＮ仔，今次真係起飛拿……