[惡搞無極限] 就係咁，我同幾個豬朋上左大陸獵金: １８２　鹹柑桔恐慌症

我地一行五個人坐左係一間茶樓入面，而阿妹用緊一副擔心既表情望住我地四個。

鬼咩，當你面對住四個好似腦缺鈣，痴痴呆呆既人後，飲水漏水，食飯漏飯既人時，你都會好似佢咁擔心……

再實體Ｄ形容咁，你地可以想像下星爺果套九品芝麻宮咁，佢本青天秘笈比人燒左之後，成個人呆左果個樣。而我地仲要不停口講：「無拿……無拿……」

要阿妹一個人面對住四個包龍星，妳都未話……其實諗落又幾好笑。

「無拿……無拿……」我地四個無目標咁望住遠方，腦入面只係不停想像起果樽黑色既野……





鹹……唔好提果三個字！！！呢三個字而家同佛地魔一樣！！！唔好提！！！好恐佈！！！

「點解你地見完樽野會咁架……」阿妹不停嘗試放野入我地口度，但係都徒勞無功，「你地食Ｄ野啦，又尋晚到而家，你地咩都無食過啊。」

坐左陣，阿妹搵左既人到左，因為佢尋晚見到我地咁，佢好似搵左個收驚大師黎。

「師父，唔知佢地做咩，佢地尋晚一見到……」阿妹無講果三個字，因為佢尋晚試過，我地一聽到，就失左常，「……就變成而家咁拿。」

「鹹柑桔？」呢個師父聽到我阿妹講，唔覺意講左出黎，我地果制又要著拿。





「鹹！柑！桔！！！！！！！！！正啊！！！！！居家良藥你唔係唔要嘛！！！」阿俊捉住個師父埋黎，然後拎係壺熱茶，灌入佢既鼻度……係！係鼻啊！

而阿倫同阿輝就係旁邊唱，「牛肉加蔥花要烏東埋，照燒Ｄ雞……」仲一邊唱一邊跳果隻舞，唔好問我點解係呢首歌，一Ｄ都唔關鹹柑桔事，但係當一個人痴呆到一個點，你係唔會知道佢點解要咁做。

而我，就拎係左枱面既一隻糯米雞，同阿俊講：「阿俊，鹹柑桔係個樽咁耐，都肚餓拿，快Ｄ比佢食Ｄ野先。」

「好啊。」阿俊既笑好空洞，我都係，我地無理過師父不停叫救命，亦都無理阿妹佢係旁邊不停叫唔好，隻糯米雞慢慢接近師父既口，「食野啦，鹹柑桔。」阿俊呢一句充滿怒意。

但正當我就快喂到佢食之際，一個人既身影出現，令到我成個人醒晒。





果個人，咁熟既……好似……係我女朋友阿欣ＷＯ！？