[惡搞無極限] 就係咁，我同幾個豬朋上左大陸獵金: ２２４　和平飯店

其實舅父咁既舉動，都令我好懷疑佢點解要咁做，再佢又係我舅父，我應唔應該聽佢話好？就係我諗緊好唔好聽舅父話之際，阿俊就講：「我呢幾日有Ｄ事要做，所以唔可以同你地一齊行動，但我每晚都會返黎呢度會合你地，我要出去整野，今晚再見。」

怪既，唔止舅父一個，連阿俊都有少少怪。

過左一陣，方瀡話想帶我去一個地方，阿妹當然跟住黎啦，而阿欣就覺得有野玩，都一定會跟住，但阿倫同阿輝兩條友就話黎到呢度想回圍睇，所以就唔跟黎，而且佢地跟黎都無咩幫助，所以就由佢地兩個自己去玩啦。

我地三個跟左方瀡去左一間茶樓度，搵左其中一張枱坐，唔會掛，方瀡剩係想帶我地幾個黎飲茶？

「方瀡，你帶我地黎呢度做咩？」阿妹問。





方瀡悠閒地飲左啖茶，然後話：「呢個地方，就係你阿爸死當日黎過。」

聽到方瀡咁講，我同阿妹都四圍望一望呢間茶樓。

其實呢間茶樓無咩特別，可以話係唔顯眼添，而且內部無咩特別既裝修過。

「呢度百年如一日，咩都無變過。」方瀡放低佢手中果杯茶話。

「百年如一日？」「無變過？」我同阿妹問。





「呢間茶樓係一位已經金盆洗手既老前輩開，好多江湖中人都會黎，慢慢咁呢間茶樓就成為左所有大哥黎講數既地方，但係果位老前輩好唔鐘意，有一次仲發火話如果以後有人係佢呢度嘈，佢就會將果個人左手斬落黎煮左比果個人食，從此以後所有想避人既人都會黎呢度。」方瀡一路講，佢就一路好悠閒咁飲茶望住聽到好入神既我地。

「慢慢，呢度就多左個名。」方瀡除除地道。

「咩名？」我地三個一齊問。

「和平飯店。」方瀡話：「而且，呢度係你阿爸死前黎過既地方。」