一行人坐上左一部七人車,我眼見除左我、阿欣同阿妹外既其他人神色都輕鬆,只係我地三個人都好沉重,其實好難得見到阿欣有呢種神情。

車停,我地走出車箱,見到既係幾百級既樓梯同埋一間寺廟。

「你阿爸而家就係度安左個神位。」舅父話。

我地慢慢一步一步行上去,而期間,我問左舅父一個問題:「舅父,點解你唔話比阿媽聽阿爸葬左係呢度?」

舅父答我:「佢知道阿福死左之後已經好大打擊,我唔想佢再問有關阿福死既事。」





有更沉重既心情行完呢幾百級樓梯,認真講係真係有D累,但我唔敢怠慢,因為我都想知阿爸葬既地方係點。

聽舅父講呢個位係佢同方叔叔幫手搵同搞,知道既人得佢地兩個同呢個老前輩,而家,就多左我地。

舅父同呢度既主持講左幾句後,佢就帶左我地去阿爸個神位度。

呢度都幾大,行過一條又一條路,經過唔同既花草樹木間,鳥語花香,我諗阿爸會好鐘意呢度。

「幾位施主,到了。」帶我地黎既人同我地講。





我地面對住一個鋪滿磁磚相既牆,望住一張我地覺得比較熟悉既相上面,「爸爸啊……」阿妹既眼淚又流出黎,佢行左上前,用手摸一摸張磁磚相,可能因為有人打理,磁磚相上面好少塵,「可兒真係不孝,而家先黎睇你。」

我聽到阿妹呢句都好慚愧,呢咁多年黎,我都無過問過阿爸既死同佢葬左係邊,一別咁多年,上次見面係佢叫我好好照顧屋企,好好睇住阿媽,但我又係未真係做到呢?

我企左係阿爸張相面前,好唏噓咁嘆左一口氣,然後,阿欣拎出佢既紙巾,幫我擦左擦眼淚,原來,我自己既眼淚都係不知不覺間流左出黎。

然後阿欣行去阿妹邊,比左紙巾佢,再用另一張新紙巾擦一擦阿爸張相,「世伯,我地黎睇你拿。」阿妹見到阿欣咁做,都一齊擦張相。

舅父呢個時候拎左三柱清香黎,分別比左我、阿欣同阿妹,我地三人拎過左三柱清香,企係阿爸張相面前,手高舉過頭,拜三拜,「阿爸,你個不孝子賢仔黎睇你拿。」
已有 0 人追稿