我車阿福去到上船位置既附近,「我係差人,出現呢d地方唔係咁好。」

阿福都明白我既意思,所以點一點頭落左車後,同我講:「你真係要幫我照顧好佢地。」

「知道拿。」我答。

目送阿福既遠去,唔知點解,睇住佢既背影,就好似送緊好兄弟去一條不歸路咁。

就係呢個時候,電話響起,「喂?」





「阿哥……」係阿芳把聲:「阿福佢唔見左啊……佢留低左封信後就唔見左拿……你可唔可以叫人幫手搵下佢係邊啊……」

我一路聽住阿芳既喊聲,望住阿福愈走愈遠,然後話:「好,我搵人去搵下,妳而家點,我過去妳度睇下。」

「好……」然後,阿芳收左線,而我亦踩油門離開,係倒後鏡中,我望住頭先仲見到阿福既位置,而家已經空無一人。

-------------暫時告別既回憶分隔線-----------------

「舅父,咩你咁大整蠱啊,留個頭等比阿爸佢。」我望住佢話。





「我點知著草個頭等會咁與眾不同姐。」舅父答。

「咁又係……咁你繼續啦……」我話。

------------你地好掛住既回憶分隔線又返黎拿-------------

一去到阿芳到,就見到佢攬住賢仔係度喊,而賢仔就不知所惜咁望住佢阿媽。

「阿哥……」阿芳知道左我黎左,佢喊得好凄涼咁望住我,「搵唔搵到阿福啊……」





我只係望住佢,都唔知講咩野好,而我又發現,係阿芳既腳邊有一封信,我諗,就係阿芳頭先係電話所講既信。

而信中既內容,大致上係咁:

阿芳:

可以同妳結婚真係好開心,更開心既係可以同妳組織家庭,生左一個咁活潑既仔……但係,我對唔住妳,我做左一樣好對妳同賢仔唔住既事。

可能,一切都係有因果,就係因為我㨂左呢一條路,所以發生今日既事,當我收到對方寄比我既信果陣,我真係倒抽一口涼氣,因為信入面既所有人,都係我最重要既人,我唔可以比你地有事,所以,請原諒我咁做。

我明白,當我寫完呢封信之後,一踏出呢個家門,就唔會再有機會返黎,但如果,犧生我一個人可以令到你地所有既人都相安無事既話,我決定接受呢一次交易。

今生,我將對妳既愛分多左比另一個人,但下世,我希望會完完全全將一份愛奉獻比妳。

阿福





我睇完信入面既內容後,都唔知點反應好,我諗信中所講既果d人,就係阿福比我睇過果d相入面既人……只不過,原來係唔只得果d人。

「舅父……呢張相係爸爸讀緊其中一封信時,跌左出黎架,我諗應該係你既。」賢仔佢比左一張相,而相入面果個人,係我,仲有一個用黑色油性水筆既圈圈住我個頭。

「點解?點解你要咁做?」原來我都係果班人既目標之一,點解阿福要自己一個人去冒險。

「阿芳……」所以,我決定要……「我知阿福佢去左邊。」
已有 0 人追稿