[惡搞無極限] 就係咁，我同幾個豬朋上左大陸獵金: ２５４　一刀

暴龍頭先果句剛剛講完，平叔已經將佢手中既棋子擲向佢，但經過今日既事後，暴龍佢醒左，「擋住！」佢只係一聲令下，佢身邊既人就出黎幫佢擋晒所有既棋子，「今日我帶既係親兵，洗晒腦覺得仍欠左我咁，個個都心甘命抵為我，係未啊？」佢聲咁問在場既人。

「是！暴龍哥！」果班人納喊。

「你地係未好甘心為我死啊？」暴龍又問。

「是！暴龍哥！」果班人又答。

平叔冷眼望一望呢班人，「好女婿，你能打嗎？」





「可以啊。」我答：「但係大寶係佢地手上……」

「其他的人交給我，你去把大寶拉過來。」平叔話，但估唔到我地兩個正要行動果陣，暴龍哥就話：「你地未郁啊，我知黎地想點，我唔會咁閪蠢企係度等你地衝過你架，無我既吩咐，你地行前一步，我就開槍殺晒左佢。」

由到步到而家，我都未見過平叔發火，佢邢家怒目望住暴龍，好似想殺左佢咁款，「小兄弟，如果有機會，我一定會親手把你幹掉。」

「一定唔閪會有機會。」暴龍好串咁話，然後望住我，同我講：「你，埋黎。」

我慢慢向佢既地方行過去，行到大寶面前果陣，佢叫停左我，然後，佢叫佢身邊其中一個小弟比左把刀佢，佢將把刀拋左去地上面，「執起佢。」





我慢慢彎腰執把刀，但係就執到果陣，佢一腳踼向我，「叫你執就執咁閪聽話都有既。」呢一腳，我忍。

當我慢慢企返起身果陣，佢一腳踩住我唔比我企直，然後話：「你而家係狗，扒係度。」我好用力咁抵抗，力度壓過佢後企直，然後一手拎起把刀，手起刀落。

「砰！」一槍聲，無打係我身上，而係打左係大寶既身上，大寶好痛苦咁叫，而平叔亦都移左過黎，「大寶！」

暴龍將支槍指住左大寶個頭話：「你再行近我就開槍打佢個頭。」呢句，佢係同緊平叔講，平叔聽到後就企左係原位。

而我，就拎住把刀，面對住暴龍。





「你依然咁有骨氣，好，我就比你有骨氣。」佢用槍柄打一打大寶個頭，「呢條友做二五仔，督你出黎，你無理由就咁放佢，我比個機會你，你拎住把刀，由頭中間斬到落佢屎眼度，一刀過。」暴龍好輕鬆咁講。

「你個仆街。」我對住佢講，而暴龍聽到後就話：「如果你唔斬，我就開槍，仲有，我即刻叫我Ｄ兄弟姦左你老婆。」佢拎起左個電話，打通左後比我聽，我聽得出，係長途電話既聲。

「ＤＯ……ＤＯ……ＤＯ……長途電話聲真係搞野，不停叫人去ＤＯ野都有，唔知香港班兄弟係你屋企樓下等呢個電話等左幾耐呢？」

我望一望電話，再望一望大寶，然後又望一望平叔，只見佢既眼神，帶有一種無何奈何。

「暴龍！你唔好有機會比我殺你！」我大叫左一穀。

「都話一定唔閪會有機會啦，快Ｄ斬啦，個電話就通，如果比你個仔望住我班兄弟姦你老婆，會有童年陰影架。」暴龍佢笑得好賤。

而我，閉上眼，手起刀落，一下揮刀既聲音，刀鋒劃過肉時產生既反作用力傳到我既手心，好似有少少血淺到我塊面上面，而我，聽到人既叫聲，係大寶，「老爹！！！」仲有一聲好燥底既聲音，「你條閪佬又會跑得咁撚快。」仲有，平叔既聲音，「兒子。」而我最聽得清楚既，係一下槍聲。

「砰！」槍聲響徹整個大堂，「仆街！邊閪個！」我慢慢張開眼，見到暴龍頭先拎槍既手被打傷，然後，一個熟識既身影一支箭走到暴龍身邊，捉撚住佢然後用由下指住佢下巴，暴龍帶黎既人不停叫囂，仲話：「我們這麼多人，你可以殺得了誰。」





果個捉住暴龍既人好冷靜咁望住果班人，然後話：「我殺他一個就足夠。」

同樣既對白用唔同既語言講，都係咁有氣勢，「阿志。」阿志佢拎住支點三八指住左暴龍，向我笑一笑話：「唔好意思，我頭先上黎果陣坐頭等，所以搞到耐左少少。」

我聽到佢咁講後都笑一笑，但之後所見到既野，我就笑唔出，我首先見到既，係比我斬左一刀既平叔，果刀斬左落佢隻手度，而另外，我見到遠處既門外有個人影愈來愈近……

「阿福！」我望住係門口叫住我名既阿芳，一時唔知比Ｄ咩反應好。