[惡搞無極限] 就係咁，我同幾個豬朋上左大陸獵金: ３３１　複雜關係

「等等……妳話妳細佬殺左妳家姐……如果好似妳頭先咁講，妳家姐係我阿妹既阿媽？」我問。

「係。」還珠格格答得一副理所當然。

「咁妳弟弟叫阿碇，佢係……」「佢就係碇司令。」佢呢個答案，講出黎好無情，好冷血。

如果還珠格格講既野係真既話，咁姐係碇司令同阿妹係親戚！？

但應該無可能架ＷＯ，老前輩係阿妹爺爺，大寶係阿妹既阿叔，咁姐係眼前呢位還珠格格，係大寶個妹！？係老前輩個女！？





呢一點，點諗都諗唔通，「無理由，阿妹媽媽既阿爸，係有殺人王之稱既……」「係，無錯，因為家姐係我地同母異父所生既，我地媽媽果陣同殺人王有一段情，不過生左家姐同大寶後，媽媽就改嫁，家姐跟媽媽，大寶就跟殺人王。」

我聽到咁後，都仲係難以置信。

「而阿媽改嫁後，就生左我同弟弟，家姐都有帶過我去見大寶，不過，弟弟就唔知點解，佢好抗拒，未見過都好抗拒，就算佢一直都好聽家姐話，都係未見過大寶。」所以大寶果陣就唔知碇司令原來係自己既細佬。

「從少，家姐同弟弟既感情就好好，好到，一種令我懷疑既地步……」還珠格格話，然後我就問：「咩野地步？」

「家姐對弟弟係純粹既親情，但係弟弟對家姐既，係唔可能既愛情。」ＷＨＡＴ　ＴＨＥ　ＦＵＣＫ！！！！！姊弟戀！？亂倫！？





「果陣家姐嫁比長恨哥既時候，弟弟反應已經好大，好想殺左長恨哥，不過家姐一直叫佢係長恨哥都幫手，弟弟一向好聽家姐話，所以佢一直粒聲都唔出，但直到你阿爸出現，搶左家姐後，弟弟又再次咁發晒脾氣，又話長恨哥對家姐唔好所以家姐先走，又話你地阿爸配唔起家姐，所以就計劃左一個可以一次殺晒兩個既計劃。」還珠格格講完後，露出左一個心寒既樣，「佢由細到大，都可以實行好多看似無可能，但係佢又會實行到。」

「但係，佢應該知道自己係弟弟，無可能可以同家姐一齊……」「佢地係同母異父嘛，佢一直都咁同自己講，所以無放棄過，直到佢係家姐面前表白果一刻，家姐話佢係怪物，係癲既，佢將咁多件既愛一剎那間化為恨，係仲係細過既時興隆面前，殺左家姐。」

實在太過複雜，呢Ｄ真係要畫個關係圖出黎先可以清楚了解到。

而還珠格格就係幅畫面前話：「你地可以選擇原諒，係因為你地知道你地親人係錯手，但係，我唔可以原諒佢，因為佢唔係錯手。」