[惡搞無極限] 就係咁，我同幾個豬朋上左大陸獵金: ３４１　賓館小休

我地係ＭＡＮ姐安排下去左一間賓館度住，阿妹佢仲訓緊，可能因為佢暴走過，阿欣同佢同房，佢照顧緊阿妹。

我就同傷我好重既阿俊一間房，阿俊到而家都未醒。

而我，就拎住還珠格格比我既名單睇緊，雖然上面大有地址，但係我上網搵果Ｄ地址，大多數都只係搵到邊個市，Ｄ街名完全搵唔到。

可能，隔左咁耐Ｄ地址已經唔同晒，本來以為有一線希望既我，又再次望天打掛。

就係呢個時候，阿欣黎左，佢推開房門後企係原地望住我，我睇得出，佢心中既害怕，「過黎啦。」





呢一句後，阿欣就跑左去我身邊，好似隻貓仔伏左係我身上話，「頭先我發左個惡夢。」我諗佢講既係夢魔既催眠，「係夢入面，我又見到果樣野。」

阿欣講既果樣野，係童年果陣佢媽媽打佢既陰影。

「傻啦，有我係度，無人可以傷害妳。」我繼續安撫佢，而阿欣就好認真咁望住我：「阿賢，你唔好有事啊，我只相信，呢一生就只有你可以保護到我，所以你唔可以有事，如果你有事既話，我都唔知點算。」

其實，我無阿欣講到咁勁，不過我明白阿欣無左我真係會好大打擊，所以我就話：「放心啦，我唔會比自己有事。」

阿欣就係咁伏左係我身上面訓左，而我就望出窗外，諗緊，由搵遺書到而家，我地仲要經歷幾多野先可以搵到阿爸留低比我既野。