[惡搞無極限] 就係咁，我同幾個豬朋上左大陸獵金: ３６２　二選一

如果同勞斯萊斯所講既野一樣既話，咁而家花木蘭未好危險？

而且佢有阿爸其中一封遺書，絕對唔可以比碇司令搶走架。

「我地而家即刻去搵花木蘭！！！」就係我好雄心壯志叫左出黎果陣，一個人企左係病房門口，「黎左拿。」

我地三個望向房門，我既錯愕可以話ｏ咀ｏ到跌落地，因為企係房門果個人，正正係花木蘭。

「點解妳會係度架！！！！！！！！」我大叫左出黎。





而花木蘭就行過黎話：「呢度醫院黎架，講野細聲Ｄ啦。」佢講完後就行到阿欣面前，輕批住佢既下巴話：「我掛住ＢＢ，所以忍唔住黎搵佢嘛。」

「耶～妳好衰架～」估唔到阿欣可以咁嬌嗲。

「咁我呢？」勞斯萊斯問。

「掛埋啦。」花木蘭比左個飛吻勞斯萊斯，勞斯萊斯由當堂濕晒……頭先先話唔應該掟低ＭＡＮ姐去玩係唔應該既事，而家一見到花木蘭就咁款……

而我就繼續問我既問題：「我問妳點解會黎啊。」





花木蘭望一望我，然後笑左一個意味深長話：「諗住方便你，黎搵你順便見你阿妹，咁就可以比封遺書你囉，係呢，你阿妹呢？」

佢咁樣一問，我只好無奈地答：「佢比人捉走左。」

「捉走左？咁真係唔好彩，白行一次添。」佢行到我既面前問我：「咁你之後諗住點做？諗住搵返你個妹？定係搵我講果三樣野換遺書？」

其實我係決家去搵佢，但係佢咁問又有道理，我而家應該去搵阿妹問個明白，定係繼續去搵遺書先呢？