[惡搞無極限] 就係咁，我同幾個豬朋上左大陸獵金: ３７３　迷之少女又出現

係呢個不夜城入面行左陣，真係感受到好熱鬧既氛圍，阿欣、勞斯萊斯同花木蘭三個人都玩得好開心，唔知佢地記唔記得我地搵緊阿妹架呢……

我拎住手中既地址，望住每一個門牌，都係仲未搵到，不過我相信慢慢搵一定會搵到既。

佢地三個人玩得好興高采烈，係後面見到佢地三個咁開心都覺得心情愉快，但係點解……但解望落我眼前果三個人好似有Ｄ唔同左咁既？

我行前拍一拍阿欣既膀頭，「阿欣……」當我以為係阿欣既阿欣一回頭，一句好純正既普通話彈埋黎，「你哪位？」

望住呢個我以為係阿欣既阿欣，再望向另外果兩個人……頂！點解有個係幾似勞斯萊斯既勞斯萊斯既大叔，同埋有一個好似花木蘭既花木蘭既女人既？





大家唔好混亂，因為我而家仲亂，可想而知，我同佢地走失左！！！

我同個好似阿欣既阿欣個女仔講左對唔住好，就左顧右盼左一下，死啦，呢度咁多人，要搵返佢地唔易架ＷＯ。

就係呢個時候，我身後突然有一個人拍我既膀頭一下，「喂，你有盪失路啊？」

呢把聲音好似係邊度聽過，我轉身望向發聲既人，係一個好靚……好靚既女仔，然後我記起，呢個女仔係果陣我係『正正』盪失路果陣，幫我帶路既果個女仔。

我好尷尬咁笑左下，「係啊，我盪失路。」然而，果女仔微笑咁話：「咁蠢架你，盪失路。」





「點解妳會係度既？」我問。

「無得解。」個女仔笑得好開心咁話。

呢個女仔笑係上黎真係得意……等等，而家唔係講呢Ｄ既時候，「我同我Ｄ朋友失散左，而家都唔知點算好。」

「你Ｄ朋友？花木蘭？」個女仔問，咦，點解佢又會知道我Ｄ朋友入面有花木蘭呢個人係度既？

「係啊。」我對佢點一點頭。





「咁我帶你去搵佢，不過，我唔想比花木蘭佢見到我。」又係好似上次既說話，點解呢個女仔唔想比花木蘭見到佢呢？

我無問佢呢個問題，反而問左佢另一個問題：「我記得妳上次話下次會話比我知妳叫咩名，今次應該就係下次，所以妳叫咩名啊？」

個女仔聽到我咁問後，笑左笑話：「都係唔話比你知住。」然後做左一個好可愛既鬼臉。