[惡搞無極限] 就係咁，我同幾個豬朋上左大陸獵金: ３７４　搵返佢地

係人來人往既街上面，我跟住呢個迷一般既少女係人群修面穿插，我一路跟住佢後面，就一路諗，佢點解會係度？佢點解會幫我搵花木蘭？但佢又點解唔想比花木蘭見到？

我跟住佢後面，好奇怪，點解佢行左咁耐都唔喘氣既？以佢而家呢個速度，我已經跟到上氣唔接下氣咁，就開始有少少跟唔上，但係佢就完全無放慢既意思。

直到，係一個十直路口既地方，佢突然停左係度，收唔切制既我差Ｄ撞到佢，然而，佢停左後閃左係我身後面，緊緊捉住我背上面既衫話：「你朋友就係對面，記住，唔好比花木蘭見到我。」

我望一望前面，見到既係佢地三個好似搵緊我。

而我就話：「放心啦，我唔會比佢見到妳，而且我唔會同佢講係妳帶我搵到佢地。」





少女聽到後微笑咁點一點頭，然後話：「咁我走拿，唔好再盪失路拿。」

正當佢離開之際，我就望一望身後，望住佢既背影話：「妳其實叫咩名啊？」又係一個咁既情形，我又問多次佢叫咩名。

而少女就笑住答我：「下次先話你知。」

「妳上次都係咁講，但係頭先又無話我知。」我話，而少女唔知係聽唔到我講既野，定係唔想答我，一溜煙咁走左。

跟住，從後而來既一股力，令到我差Ｄ跌左係地上面，「阿賢，頭先唔見左你，幾驚你有事啊。」原來係阿欣，佢衝過黎從後抱住我。





而勞斯萊斯同花木蘭都趕上，而勞斯萊斯就好擔心咁話：「頭先我幾驚你係比碇司令既人捉左啊，好彩而家搵返，嚇到人地心肝仔差Ｄ跳出黎添啊～」勞斯萊斯，你講時講其實可以唔駛扭身扭勢。

然後，就係花木蘭既說話：「我地已經搵到飛伯比我地既地址。」

我聽到佢咁講後，就話：「個地址係我度ｗｏ，你地又會搵到？」

花木蘭慢慢咁將個地址係我面前默念左一次，然後話：「我過目不忘，所以我記得，而家齊人我地可以一齊去拿。」

既然花木蘭搵到，咁我地就出發，但出發前，我又望一望頭先果位少女離開既果個方向，「咩事啊，阿賢？」阿欣問我，而我就答佢：「無……無咩事。」我覺得，我仲會見到呢一位少女。