我永遠都會記得果一個朝頭早,因為果一日,係我一生以來最唔開心既一日。

「可兒!快D醒!可兒!快D醒!」媽媽既叫喊聲,我張開睡眼望住面前好慌張既媽媽。

「早晨……」我同媽媽講,而佢就好慌張咁抱起左我話:「我地要快D走,唔係就走唔切架拿。」

「走去邊啊?」我問,但係媽媽無答我,只係急步跑向門口。

但係呢個時候,「你地快D將所有既人捉出黎,我就唔信搵唔到果個女人。」門外面既聲音,令到媽媽停左腳步,媽媽係門逢望出去望左一眼,然後就行到大櫃果邊同我一齊匿埋。





一入到個櫃,頭先大叫既女人就走左入屋,係櫃門既逢望出去,見到個女人巡視緊間屋,行到我地匿埋既大櫃果陣時,媽媽摀住左我既口,佢驚我發出聲音令到個女人發現我地。

個女人望住個櫃,笑左一下後就走左出屋,而媽媽見到佢走左出去後,就好似鬆左一口氣,不過,原來……

「我地黎呢度係搵一個女人!」個女人走左出屋後就大叫起黎,而櫃門既逢正好可以望到屋出面。

「我諗我要搵既果個人!都知我係邊個派黎既!佢一定會知道如果搵佢唔到!果個人會點做!」個女人拎左一把刀出黎,「我已經將呢度住既所有人都帶到呢度!表現D野比妳睇!」

一刀,係其中一個被捉既人頸上面劃左一刀,血不停噴出黎,「呢度都幾多人住下,妳未慢慢匿埋囉,我殺晒D人先再搵黎。」個女人話,而媽媽就望住被佢殺既人開始係度喊。





「媽媽?」我望住喊緊既媽媽,而佢摀住左我雙眼,「可兒唔好望。」佢將放左係衣櫃既EEYORE拎左比我,「一陣妳攬住EEYORE,記住有佢陪妳,妳要等到出面無晒人,妳先可以出去,知道未?」

「知道。」我點一點頭。

「一陣媽媽要出去,妳記住,當我一出去,妳就要抱緊EEYORE然後閉上眼睛,唔可以望出黎,直到無晒聲先可以張開眼睛望下出面,知道未?」媽媽吩咐我。

「知道。」我又點一點頭,「但係媽媽點解要出去?」

媽媽望一望我,然後又望一望出面,「媽媽無辦法……」佢錫左我既額頭一下話:「記住媽媽所講既野,一定要好好聽話,知道未?」





「知道。」我第三次講呢兩個字。

「媽媽永遠都愛妳。」媽媽喊住微笑咁同我講,然後,就打開左個櫃門。

係媽媽同我對話既期間,原來出面個女人已經殺左好多個人,佢一見到媽媽後第一句就問:「妳終於出黎拿。」

而我就聽媽媽既說話,佢一出去我就閉上眼睛,緊抱住EEYORE以及爸爸同爺爺送比我既鏈。
已有 0 人追稿