「咦?其他人呢?」我離開校門,發現不見了其餘的同學。
 
「哦,頭先行到出去,發現唔見左你,我咪返黎搵你囉!我叫左我女朋友帶佢地去附近商場食飯架啦。」雷少邊走邊解釋著。
 
「原來係咁。咦,點解我地唔過隔離坑口村度食飯嘅?」我看見學校對面便是坑口村了,而且也有一些食店。
 
雷少用奇怪的眼神看了我一眼:「你……唔係住將軍澳區?」
 
「吓?係呀,我住觀塘區架,點解你咁問?」我疑惑的看了看他。
 




「無,只係,如果住將軍澳區嘅,應該唔會咁問!」雷少繼續邊行邊說。
 
「點解嘅?」我問。
 
「因為,條村唔係太歡迎『外人』!」雷少壓低了聲線,稍為靠近我說。
 
「外人?係咩意思?」我吞了吞口水,緊張的問。
 
「呢層……我諗你都係唔好問咁多比較好!」雷少閃閃縮縮的,真奇怪。
 




「咁點先?係咪吊我癮呀?」我不滿的道。
 
「唔係呀,我都係為你好Ja,你頭先係咪見到學校門口隔離D相會郁呀?」雷少以略帶關心的語氣跟我說。
 
「吓?你點知架?我明明……」我嚇了一跳,因為剛才的情況,連我自己也分不清是幻覺還是甚麼,他怎會知道的?
 
「因為你唔係第一個外面黎讀嘅學生,以前我有個朋友,佢又係外面入黎讀,佢有同我講過,第一日返學又係見到D相係度郁,之後有一晚,佢同我地係學校搞完D活動。走果陣,佢一個人入左坑口村,之後就無再見過佢!佢家長都嘈到上黎學校,仲報埋警!跟住,有一日佢家長黎到學校D相面前,又跪又拜咁,話咩求你地俾返個仔我,之後神奇嘅係,果個人第二日俾人發現訓左係坑口村籃球場。救返之後就退左學,聽D老師講仲好似成家移晒民,無再返過黎。」雷少在提起這件事時,感覺有點緊張,只見有些汗從他的額頭滲出來。
 
「咁……咁關外人咩事呢?」若只是單憑一件事情,便這樣判斷,未免太過令人難以相信了。
 




「其實,我親眼見證嘅,係得一次,但係呢十年黎,根據以前學生同我地所知道的數字,咁嘅情況,最少都有一百單!而且全部都係非將軍澳區區民!所以,基本上,住係呢區嘅學生,尤其係我地學校,係唔會入去坑口村!而且,你岩岩又見到D相係度郁,我唔希望又有一個人,消失係我眼前!你都係小心D,唔好再問多餘嘅野,好奇心……可以殺死貓!」雷少這樣對我說。
 
「咁……咁者係點呀,你算係警告我咁話啦喎?」我大著膽子的對他說。
 
「唉,唔係警告,只係提醒你者。簡單講啦,我第六感由細到大都好強,有時一D感覺,連我自己都解釋唔到!不過,呢種感覺,的確曾經救過我好多次!而果個消失左嘅朋友,我亦都一早感覺到,佢係留左係坑口村,只係唔知點解,搵緊都搵唔到!而我第一眼見到你,已經有種感覺,你會捲入某D事入面,而且仲同我地學校有關添!我係度讀左五年,知道呢間學校有好多奇怪傳聞,我估你都唔想係呢一年入面發生D咩事架?」雷少繼續以關心的語氣告訴我。
 
「你咁講者,唔代表我要信架!同埋,我夠經歷過D勁野啦,再黎多D都唔驚呀!不過見你咁好心提我,我即管唔問啦!講明先呀,我唔係驚呀!我係尊重你,當你朋友,即管聽下你講Ja!」說真的,自從小敏事件後,我又經歷了不少東西,也在天命叔那裏學了些東西,但可以的話,還是不要碰上怪事為好。
 
「哼,咁得啦,最緊要你唔去掂者,你唔主動去掂嘅,我覺得你應該無事嘅!好啦,我地行快少少啦,我好肚餓呀!」雷少看我已經明白,亦放下了擔憂,催促著我去吃飯。
 
「得啦,行緊囉,我都好肚餓呀!有咩食架?」我邊加快速度邊問他。
 
「ABC餐囉,仲有盅頭飯,十幾蚊,勁抵食!」
 
到了餐廳後,和他們交談了好一會,大致上知道了大家的興趣,過往成績等等。




而且,我更發現,除了雷少和冰冰是本校兼本區生,阿諾和阿奶也不是本區的學生,這是偶然嗎?其他重考生是否也和我們一樣,不是本區居住呢?
 
我沒有細想這個疑問,反正應該不會出甚麼問題吧?要是真是這樣就好了!
 
吃過午飯後,我們便分別離開。
雷少和冰冰會去自修室,聽到後找不禁脫口說了一句:「哇,無人性架,第一日就去自修室。」
雷少只露出一個苦澀的笑容,然後便被冰冰拖走了。
只有這一刻,我突然覺得,「其實毒撚一個更開心」真的是至理名言。
 
阿諾則約了別人打籃球,我這順利邨櫻木花道當然立即表示有興趣。
 
「咦?你都打籃球架?以前打學界唔見你嘅?你打邊區同咩位置架?不如一齊過去打啦,我同班舊隊友好耐無見,今日肯定打返兩三個鐘,Join唔join?」阿諾興高采烈的問我。
 
「屌呀,呢條友原來打開學界!我平時都係同籃球學會D人打下,同埋恰下D低Form仔!仲要打三個鐘,算啦,我都係唔好去送死啦!」我心想。
 




「聽落幾吸引!不過真係唔好意思,岩岩先醒起要返幫阿媽寄信,遲左就唔得掂!下次,下次預我!」我又胡亂說了一些理由來推搪。
 
「咁算啦,下次再一齊打波啦!咁我行先啦!」阿諾說完便離開了。
 
「好,咁我都走啦,我行呢邊,你呢?」阿奶問我。
 
「我行另一邊,聽日見啦!」我對她說。
 
和他們分別後,我又不自覺的沿著原路走回學校。
然後,我來到了坑口村外面!
雖然現在還是白天,但不知道為甚麼,我竟感到有點陰森的感覺!
我看著坑口村的牌坊,意識好像變得有點模糊了。
 
我定一定神,然後手上動作一轉,結起了降伏心魔指印,使自己心靈平靜下來。
「呢條村,係有D古怪呀!」我看著牌坊,心裏不禁這樣想著。




 
忽然,我感受到,在牌坊背後,好像有一股強烈的視線襲向我!
然後,我定了睛看一看,隱約看見有一個黑色的身影,在牌坊後面偷看著我。
我還來不及思考,身體已準備行動,要跑去追那黑影了。
 
「陳同學!」我左腳已半踏出馬路,卻被這叫聲給制止了,我回頭一看。
「咦,Miss Wong?你仲未走呀?」原來是我的副班主任。
「我準備走啦。你呢,放左咁耐都未走嘅?」
「哦,岩岩同雷少佢地去左附近食飯,依家準備搭車走囉。」
「咁你係邊度搭車呀?」
 
我指了指坑口村的小巴站,示意我要搭這小巴。
其實我根本不會坐這輛小巴,我只是想試探一下,究竟雷少說的東西,有多真確!
畢竟老師在這裡工作多年,應該也會知道點詳情吧!
 




「哦,你搭呢架。好啦,咁我行呢邊啦,聽日見。」說完老師跟我揮了揮手,便離開了。
 
「奇怪,點解佢好似一D反應都無嘅?唔通雷少呃我?但佢個樣……又唔似喎!Miss Wong又好似完全唔在意咁?唉,咁鬼煩架!」我抓了抓我的頭髮,感到頗為苦惱。
 
「咦!唔係喎!我係度搞咩呀?我係度讀大半年,無謂自找麻煩呀!雷少講真又好講假又好,我唔理!咪唔關我事囉!好,就咁話!返屋企,食雞脾!」我心裏雖然這樣想著,但視線總離不開坑口村這塊牌坊。
 
「唔好諗唔好諗!陳子鋒你唔好諗啦,今年乖乖地讀書啦!」我用雙手拍了拍我的臉頰,然後離開了這個坑口村,直接回家去!
 
回到家中,天賜這小子發了個SMS給我:「點呀,新學校點呀?有無識到女呀?」
我本想告訴他今天遇到的怪事,但想了想,也不是這麼特別的事情,便放棄了。
 
「哦,你死緊啦,問我有無識到女,我話俾阿詩聽你就死!」
傳了這個SMS後,我便上床睡覺去。
總算結束了漫長的一天了。