今晚,我走唔出呢間醫院: 第三章:等

當我返回現實時,先發覺Lily唔係我身邊。我周圍搵佢,行到病房附近,透過窗見到黃伯企左係病房裡面,個樣好似望緊啲野咁。正當我想行去問佢見唔Lily既時候,突然一個巨大既黑影係佢身後出現,更快速衝去黃伯度及將佢吞噬。我驚到立即伏係地下,避免被黑影見到。過左一陣,我見無咩聲氣,我慢慢企起身睇下黃伯點,卻發現無論黃伯定黑影都消失左,連一啲血跡都無...
我唔知發生咩事,但我下意識知道依度唔安全,要盡快離開依間醫院。正當我走到門口時,我醒起Lily,但我無停下腳步,我既心淨係諗要盡快離開醫院,突然眼前一黑,而下一秒就好似用左隨意門咁,我又係醫院走廊...
「你食唔食呀?」Lily係我身邊食緊餅乾,順手問我食唔食...
「我唔肚餓...」直覺話俾我知我唔係第一次同佢講。
「你行唔行一陣呀?見你好似好悶咁!」
「唔喇!我想留係度,或者我太太會突然醒返呢!」
「哦...咁我阻你...」
睇住佢慢慢離開,我就搵張櫈坐低。其實我唔鍾意等,尤其係而家無了期咁等,但偏偏我既人生卻充滿等待。同阿晴拍拖果時,等係基本動作,輕則等個零鐘,最西利果次等左大半日都未出現...
「喂!你出門口未呀?我等左你三四個鍾喇!」
「出左喇!化妝都要時間架!搭緊車喇!」


「好喇!咁你快啲啦!」
一個鐘後...
「喂!你係邊呀?又話搭緊車?」
「吓?唔係呀,啱啱行過見到對耳環頸鏈睇左一陣,得喇!就到喇!」
「你想唔想出來架?」
「咩呀?都話就到咯!」
「你有無重視過我架?你買野就大晒,你買野由我係街度白等!算啦,我返屋企訓喇!你出唔出都無所謂!」
於是果日我地就各自返左屋企,過左兩三日先搵返大家,最後都係我逗返佢。而另一次等,我等左佢成個星期。果次我係網上識左另一個,本來係想一夜情算,點知條女仲搵我,仲要被阿晴知道...
「依個邊來架?send啲咁既野俾你既?」見到佢忿怒既雙眼裡隱隱泛出淚光...
「咩野啫?朋友來,玩下講下笑咋,唔係你諗果啲...」


「玩下?你仲當我細路女呀?你地啲男人...個個都係咁既...」佢既眼淚已經流左出來...
「阿晴,我...我以後唔敢喇,你原諒我啦!一定無下次!」
我拉住佢隻手,希望佢回心轉意...
「我聽得太多以後,到最後...」佢甩開左我隻手,一支箭咁走左去...
我果時真係唔知點,打電話佢又唔聽,又唔回覆我留言,咁我唯有係佢樓下等佢。唔知係唔係連個天都想懲罰我,果幾日係入冬以來最凍幾日,仲要佢樓下係超大風既,於是我晚晚就係咁食西北風,直至一日佢落來搵我...
「痴線咩?今晚得8度咋,仲落緊雨...凍死你啊!」
「你...你唔嬲喇...」我凍到縮埋一舊,連口都震埋。
「嬲啊...我落來睇你...睇你凍死未,死左要報警執你條屍啊!」
「咁你...你咪好失望囉...乞次...」
「咦...嗱!紙巾啊!」


我立即捉緊佢隻手拉佢埋來攬實佢...
「唔好走!對唔住!呢幾日無左你我成個人唔知點咁...做咩都無晒心機咁,原來我唔可以無左你...我發誓我以後唔再做傷害你既事,你...你原諒我喇!」
佢無出聲淨係拍左我背脊幾下,我鬆開少少望住佢問:「咁...即係點?」
「嘩!差啲透唔到氣...咦...你睇你兩行鼻涕出晒來,快啲抺左去,有無Hi落我度呀?」
「你幫我抺丫,我驚我鬆手你又走左去。」
「我唔走,你快啲抺喇!」
我趁機錫佢一啖...
「喂!好污糟呀你!」
「係啊!我又污糟又咸濕,你鍾唔鍾意啊?」
「鍾意...」佢好細聲咁講。
「咩話?」我特登留難佢。
「鍾意啊!白痴!」