今晚,我走唔出呢間醫院: 終章:時間.停止

回到現實,一切都無變,阿晴依然昏迷,走廊一個人都無,感覺好空虛。點解訓係床既唔係我?點解我要同佢嗌交?點解我唔清清楚楚咁話俾佢聴成件事?依一刻我又陷入回憶中...
「Anna係我好耐之前既女朋友,今次佢搵我係借錢俾佢落仔,我係佢屋企並唔係你諗果啲!」
「咁係咩呀?你講!好搵唔搵係要搵你?你地仲有咩呃我架?」
「我已將所有野講晒出來,你唔信我都無野講...既然你始終都唔信任我既,咁第時好難相處落去...」
「咩呀?你既意思即係離婚?你竟然為左個女人同我離婚?」
「我無話離婚,成件事我都話唔關Anna事咯,你要我講幾多次你先信我啫?無事發生過呀!」
「咁你點解釋頭先既事呀?佢做咩攬住你呀?停車啊!我要落車!」
「喂!你唔好亂來啊!前面啊!啊...」
自問我係好易噪既人,但當時我已好好控制自己,而且就快撞欄既時候,我特登扭向我果邊,點解...咦?等一陣,我記得係撞欄唔係撞向部車度,咁Lily...
突然我發覺我個頭好痛,我用手摸下個頭痛處,一睇隻手成手都係血,而且有啲血更滴左落手度,但奇怪既係地下一滴血都無...


「你終於記返起喇...」
我拎轉頭,見到Lily企左係我後面,而最令我心寒既係佢背後巨大既黑影...
「其實佢已經昏迷左成個禮拜...」我同Lily係阿晴床邊,Lily慢慢講返來龍去脈:「你撞車之後送到來醫院但救唔返,但你唔知道自己死左,再加上你既執念令你既靈魂仲停留係果一日,停留係呢間醫院。」
「咁我見到既事係真定假?咁你係咩人?」
「正確來講,我唔係「人」,我係帶死去既靈魂去佢地既歸宿既使者,而你依家見到我既形態係因為你靈魂最思念既野而幻化出來。」我醒起阿晴以前中學個英文名叫Lily...
「你今日見既野係你死左做左遊魂果日發生,清楚啲講就係你不停重複果日既事情,但現實已經發生左唔同左,唯一無變既係阿晴仲係昏迷緊...」
佢一口氣講晒出來,雖然我未消化得晒,但我意識到一個事實--我已經死左同阿晴仲昏迷緊。望緊昏迷既阿晴,已經唔係以前串我咸濕仔同我嗌交既阿晴,亦都唔係係我身邊陪住我既阿晴,而家佢只係訓係張病床度。
「咁佢會幾時醒?」我問左條好傻既問題。
「其實佢既魂魄係你手,可能你地一齊撞車令佢既魂係你度。凡人講既三魂七魄,魂魄唔齊,人就唔會醒。」
「咁我點先俾返魂魄佢?係唔係跟你走就可以?」


「唔知,依種情況都係第一次,可能你會帶住佢既魂魄跟左我走,而佢一世都唔醒...」
「可唔可以俾我獨自陪佢一陣?」Lily離開左間房,只淨低我同阿晴...
「老婆呀,今次應該係我最後一次同你講野,同你嘈過,喊過,笑過,依啲一切一切我都記起心入面...你呀!以後唔好再將啲衫塞落櫃度,擺好佢,唔要既就掉左佢,記得準時食飯,你知你個胃喇,唔好咁大洗,學下煮飯,我唔係你身邊你要照顧自己呀...仲有以後要帶眼識人...搵個識得照顧你既人好好生活落去...」
「我既時間已經停左,你仲有大把時間,你要醒呀,知唔知呀?」
我係佢額頭深深鍚左一下...
「再見...」
我慢慢向後退,霎時間我見到阿晴咀角微微郁動,好似講左兩個字:「老公」
「我有啲野想問你?」
「問喇...」
「係唔係有個黃伯?佢係...」


「佢患左末其肺癌,其實你撞過佢兩次...」
「兩次?我記得一次咋喎...」
「因為時間對遊魂來講係焦意義,佢地既記憶只有死去果日既事,而且不斷重複同消失,所以就算見過都唔記得,除非佢地放開執念同意識自己已死,否則只會不斷循環落去...」
「哦...點解你成日問我食唔食餅既?」
「假如你覺得肚餓,代表你開始變成惡靈,到時就好危險...」
我一直係咁問,佢又係咁答,直至我地既身影消失...