《末日東方之珠--- 淪陷香港後花園》: 21.

21.

我倒抽一口涼氣，雙眼不自覺地瞪大，我可以感覺到我既瞳孔不斷縮細，眼球充血。
身旁既阿文下意識地用手掩住個口以免自己發出驚叫。

「做咩啊？咩事啊？」泳茹見到我地唔自然既動作，細細聲咁問，仲想另轉頭望。

「唔好望！」我即刻阻止，如果佢見到林生既慘況一定會喊得好犀利。

「噗—噗—噗—噗—」轉個頭，啲警察好似驚林生未死得哂咁，又開多幾槍。






Fuck…香港唔係唔可以用真子彈架咩？
Rest in peace. 我喺心入面默唸。

呢個時候鐵欄嗰邊傳出吵鬧聲，我地三個郁都唔敢郁。

「啱啱你又話check清楚冇哂人既？點解無啦啦有個阿叔走出黎架？」

「我點知喎，可能佢琴晚匿埋咗掛……」





「你做野硬係咁乸西架喎。」

「Sorry囉，一係我去check多次。」

「快手啦！」

Holy Shit！如果俾佢地發現我地，一定會亂槍射殺。

「快啲！匿入車底！」我用氣音同佢地兩個講，泳茹即刻匿入前面架車既車底，我同阿文就後面嗰架。而家跑走一定會俾佢地發現，唯有搏一搏。





踏——踏——踏——踏——
碰——碰——碰——碰——
呯——呯——呯—呯—呯—

個軍裝向我地靠近，沿路不斷敲擊經過既每一架車。
隨住腳步聲越黎越近，我既心跳亦都越跳越快。

「嗯—！……」當個軍裝敲到泳茹匿既嗰架車既時候，泳茹不自覺地細聲驚叫咗一吓。

「嗯？」軍裝發出疑惑既聲音，踎底，將手伸入車底，一掃，好彩掂唔到泳茹。

佢趴得更底，打算望入車底。
…………
我將十字弓既弦拉緊，上箭，準備好隨時射擊。但係如果佢死喺呢度，其他軍裝一定會衝過黎，我地一樣走唔甩。




點算好？

「喵～」呢個時候一隻黑貓從路邊跳出。

「喔，原來係隻貓。」軍裝慢慢企番起身，車底係泳茹早已熱淚盈眶，一脫離危機眼淚即刻滴落黎。
我用唇語講咗句無聲既叻女。

「Clear. 」軍裝㩒著對講機講。

「收隊。」對講機傳出回覆。

「Roger. 」

我地斷續趴喺車底，我慢慢匐伏向後爬，泳文二人見狀亦跟住我咁做，直至爬到阿文架貨VAN下面，我先敢爬番出黎。





「佢地走哂啦，出黎啦。」我見啲軍裝走哂，應該冇事。

「我地係咪…應該過去遮一遮林生條屍？」阿文一爬出黎就話。

「林生…條屍？林生死咗？」泳茹由頭到尾都背對兇案現場，根本唔知發生咩事。

「我去，你地兩個上車準備開車，阿文你睇住泳茹。」阿文點一點頭，就帶泳茹上車。

我將十字弓架於肩上，小跑步向前行，行到林生既屍體旁邊。
林生雙目突出，鮮血仲不斷咁從各個傷口湧緊出黎，死得突然，連講低遺言既機會都冇，相信林生自己都好愕然。

我將林生既屍體搬入其中一架汽車既後座，除咗件短袖底衫，冚住佢個頭。
等情況穩定咗，咩事都冇，我一定會番黎，好好咁幫你安排身後事，林生。

臨離開前，我將林生隻勞力士除底放入背囊，執番起把萬用刀，著起泳茹啱啱俾我件衫，拎起十字弓，向貨VAN走去。





「Don，我地而家去邊？」我打開副駕駛座既門，泳茹即刻問我。

「廣東道。」我用力地關上車門。

「點解啊？點解唔係即刻入西貢？」泳茹一臉不解地問。

「野外求生第一堂：隨時都要做足準備。開車。」

廣東道有間行山鋪，裡面應該有齊哂我地需要既所有物資。本地新聞一直停留喺琴晚凌晨三點，根本就唔知呢場仗要打到幾時，都係提早準備好啲。

我拎出筆記簿，將啱啱觀察到既野畫低。