當front desk將房咭交俾啫喱時,我見到佢臉上一紅。
腦海中,有個念頭閃過:「開房!」
我不禁為自己呢個諗法感到尷尬面紅。
 
係𨋢入面,啫喱好靦腆咁講:「嗯…Sky! 如果你唔想,我可以宜家就走,聽日先過嚟接你架。」
「吓?我…唔係好明你講咩呀?」
「我意思係…我…你…」呢個時候,𨋢門開,到樓層了。
「行啦,重講!」
 
啫喱一個人拎住我同佢嘅行李袋,重可以好輕鬆咁拎住張門咭,邊搵路邊不自覺咁單手轉咭,唔怪之得King 同樂少成日都話迷倒係佢嘅臂彎之下。


 
嚟到房門前,啫喱吸咗啖氣,嘗試用佢最平靜嘅聲線同我講:「Sky,我真係可以…」
「啫喱,其實我有啲肚餓,不如我哋入去放底行李,就落去食嘢啦!我好想快啲試下你講個啲甜品。」
 
成功阻止到啫喱嘅說話,佢無奈咁用房咭開門。
入到房,我相信最令我同啫喱同時「唰」一聲面紅嘅,就係嗰張雙人大床!
 
「呀…我去同佢哋講聲,睇下有冇兩張單人床嘅房…」
我一手拉住啫喱:「算啦!我真係好肚餓…食飯先好冇?」
 


結果我哋兩個冇繼續糾纏係間房嘅問題到,準備搭𨋢落去食嘢。
就係等𨋢嘅時候,啫喱佢…
佢伸咗隻手過嚟,輕輕拖住咗我。
 
我瞄咗一瞄佢,再提起被拖住嘅手。
「你咁…」揚揚兩隻拖埋一齊嘅手「係咩意思?」
「嗯~」啫喱用另一隻手摸摸鼻「咁…係咪唔拖得?」
  
我笑一笑,並無講嘢。
𨋢到,我就順從地被啫喱拖住入𨋢喇。