我應該點看待呢餐飯呢?
或者應該話,我期望呢餐飯之後,會發生咩事呢?
從未食過一餐咁糾結嘅飯。
 
眼前人待我如獲至寶,呵護備至,我知道有幾多人恨都恨唔到有個咁好嘅伴侶。
我明白,咩係「幸福唔係必然」。
 
亦都因為咁,我更加唔想傷害啫喱。
我好清楚知道自己個心,暫時根本未有空間去容納任何人。
 


我知道,今晚啫喱係我邀請嚟㗎。
兩個都係成年人,其實大家都好清楚,只要大家願意,一陣係會發生咩事。
尤其係女同女嘅關係上,我知有人會因為無咗「會有BB」同「無咁易有病」嘅原因,而容易啲同人發生關係。
 
短暫嘅關係我唔係未試過。
一年前嘅嗰個人,直到宜家,對我嚟講都係一個小遺憾。
 
但我真係想同啫喱咁樣咩?
我知唔係!
我知我想珍惜呢段關係,呢個人!


 
飯後啫喱拖住我,返咗上房。
 
「Sky!」係我坐咗係床邊,底頭都唔知應該點做嘅時候,啫喱輕輕叫咗我一聲。
我抬起頭,卻見到啫喱慢慢咁半膝跪低。
「啫喱?!做咩呀你?」我急急想拉佢起身,但反而被佢拉我坐返底。
 
啫喱誠懇咁望住我:「Sky!我明白,宜家對你嚟講,可能未係時候。我唔想你誤會,我送呢份禮物俾你,係真係想你可以好好休息下,而唔係有咩企圖。我講過我會等你,一日你未ready,我都唔會亂做任何嘢。我知,可能好多人都會話我係柒頭、Kai子,但我係真心珍惜你。我…唔介意等。」
 
「啫喱…」有個咁明白體諒我嘅人係我身邊,我重可以講啲咩?


啫喱係褲袋拎咗一樣物品出嚟…慢慢幫我戴上手…係一條有一片雲圖案嘅手鍊。
「呢條手鍊唔係咩貴重嘢,不過我想你記住,發生咩事都好,我都會好似呢片雲咁,都會係個天附近出現,陪住佢。」講完,啫喱輕輕係已經戴係我手上嘅手鍊上鍚咗啖。
 
除咗感動,我諗唔到第二個形容詞。
 
「啫喱,多謝你!」我輕撫手上那一小片的雲,再望一望面前用情至深的人「8月尾,我會放假過一過台灣,你…可唔可以陪我?我…想有個了結。」