[hehe單元日記]《四個八公的故事》第二季: S2(2) 8-10-2016 星期六 。林柏特－林伯。
要說我和葛斯這兩年發生的事，恐怕說到二零一七也說不完。但無論過程如何甜蜜，最終我們分開了都是事實。眼前的老鼠苦口婆心問我背後原因。如果正在看這篇文的你是新讀者，你可能會不知道當年老鼠是如何極力反對我和葛斯一起，他甚至因此而和我冷戰了一星期。
但如今他聽到我想分手的消息，卻又似乎不忍看見，我知道，因為他在乎我這個好兄弟。
「我仲以為你會舉腳贊成我地分手添。」我調侃說。
「我當初夠唔贊成你地一齊啦，有意思咩？」他沒好氣地嘆一聲。「係咪佢有第三者？」
阿葛有第三者？我不排除這個可能性，但我不知道。他是出了名的大男人主義，我從不會查他的行蹤，他也不會主動報告自己的去向。我們之間相處從來都只是信任，就像這次旅行，我沒有告訴他跟誰去，他也不會過問。
但假如大男人主義如他，又怎會對此不聞不問？他根本不在乎我跟誰去旅行，他根本不在乎我。
一個小鮮肉侍應將兩杯酒放低，只見他穿著一件粉紅色小背心和黑色排球短褲。我和老鼠看得入神。就像Toby所說，台灣最美的風景不單是人，是男人。
「唔係佢有第三者，係我－－」我支吾以對，不知從何說起。
「唔好玩啦，你有第三者？！」
「唔係呀…我……唉，唔識講。」我小眯一口酒，昐望酒精會為我帶來答案。
「點會唔識架！而家講緊你兩個人嘅感情呀！」
「係囉。」這酒濃但不嗆，我試著喝一大口。「而家講緊嘅係感情問題呀，你估計數呀？有公式架？」
而事實上我真的沒有什麼東西可以解釋，最起碼表面上阿葛和我相處一切正常，我們甚少爭吵，興趣相近，他在小學教體育，我喜歡看足球比賽；我喜歡看電影，他是標準的「荷李活片觀眾」；我大學讀電影系，工作是電視台的助理編導，他興趣是拍風景照；他喜歡吃辣，我為了他也開始改吃辣……
不過表面穩定的感情，是不是真的代表感情很好呢？或許滿是暗湧？我真正的意思是，我和他相處的感覺，真的是我想要的東西？
我嘗試將這種感覺厘清，並解釋給老鼠聽。
他聽完的第一個反應是：「咪住咪住……」大口把酒喝掉。「你講一大輪，我都唔知你講乜，我淨係知一樣野，就係你無野搵野嚟搞！」
可能他是對的，但為了證明不是只有我「無野搵野嚟搞」，我把阿葛三日前給我的Whatsapp訊息給老鼠看。
「林生（這是他平日對我的愛稱），當我聽到你話覺得我地之間變左，我唔敢出聲。原因係我竟然認同，但係我又唔想認同。
當年我同你一齊，你廿三歲。呢兩年入面，你成長左好多，你已經唔係當年嗰個傻更更，喺架小巴到喊到收唔到聲，仲要前面位個乘客俾紙巾你嘅細路。你成熟左好多。
然後你話你想分手，我個心好似一早已經預知會有呢一日咁。我一啲都無詫異，畢竟我同你相差八年，我一直都唔敢同你講，當年我話我仲考慮緊同唔同你一齊，除左係因為覺得你外型唔夠好之外，仲有一個原因係我覺得我年紀大你太多，我唔敢講出口，或者我真係太愛面子。
我知道呢個唔係我地分開最主要嘅原因，我地之間仲有其他問題，可能唔知點開口講，又可能就算講左，都唔識處理，甚至就算我地處理左，都返唔去以前嘅感覺。
我尊重你嘅決定，但係我希望今次旅行你會認真諗清楚，我希望可以同你一齊解決呢啲問題。我等你返嚟香港。」
老鼠的臉上滿是可惜的感覺，忍不住問：「睇到呢到，你仲想同佢分手？佢對呢段感情咁認真。」
我當然知道他對感情認真。但直到我收到這個訊息為止之前，我都不知道他對年紀這件事介懷，然而，還有多少事他未有告訴我？我隱隱擦去眼角的淚珠，說：「我對呢段感情都好認真，所以我先會決定要分開。」
老鼠始終一臉問號。
兩個人之間的感情，旁人又能明白幾多？
「算啦！出面大把男人啦係咪？無左呢個咪搵過個囉。」老鼠勉強才說出幾句安慰的話。
「做咩啫，而家又唔係我俾人飛…你唔洗咁樣安慰我喎，你呢啲說話留番同阿葛講啦……」話說出口之後我也覺得自己好像過火了。「我地只係和平分開。」
「下…咁…我係你朋友，又唔係佢朋友，同佢都無乜幾句，做乜要同佢講……」老鼠也有點詫異我說出這樣的話。「算啦算啦，你無事就得啦。」
然而，剛剛那幾句話，到底是酒精影響還是發自真心…？
－－－－－－－－－－－－－－－－－－－－－－－－－－－－－－－－－－
午夜一點，那邊的店都差不多關門，於是我們徒步走回旅館。
我們各自回房之前，老鼠輕輕給了我一個擁抱，淡淡的說了一句「點都好，我地三個都會支持你。」
我腦海中回憶著這些年來我們四個人的友情畫面，忽然閃過阿葛的畫面。我有我的四人幫，然而阿葛呢？他現在在香港會是一個人在飲悶酒嗎？
當我回到房間，發現電視的聲浪和我出去前一樣，我一邊脫鞋一邊探頭看裡面，Toby的面膜早已乾掉，卻在床上睡著了。我輕輕拍醒他，把電視音量收細。
「返嚟喇？」Toby把乾掉的面膜除下，隨手丟在一旁。「老鼠同你講左啲咩呀？」
別看Toby平日嘻皮笑臉的，他始終年紀比我們大，思想也是最成熟的。他大概猜到老鼠會和我說到葛斯的事。「想唔想同我分享下？」我本來就無意對他們隱瞞，只是不想主動提出而已。我將剛才和老鼠在紅樓附近的對話一五一十全部告訴Toby。
Toby看完阿葛給我的whatsapp後，說：「又估唔到佢會咁認真…」我知道，當年他們三個都不看好我和阿葛。但他說完那句話後就停下來看著我，只給我一個眼神，不說話，看得我很不自然。「做咩呀？」
Toby搖一搖頭。「你呃到老鼠，呃唔到我嘅。」
Toby的這一句話，仿佛有魔力一樣，使得整個空間都慢下來，我只見他把手緩緩伸過來搭在我的肩膀上，柔和地掃了兩下，未開口，我的淚水便如缺堤般湧下，他輕輕把我拉近他身邊，拍一拍自己的肩，我便整個人靠在他的肩上哭，是痛哭。
「我點會唔知你諗緊乜吖。」Toby的話就像一個控制器，每說一句，淚水便竄出來。「你驚佢擔心，你知佢當年唔睇好你地，你覺得內疚，你愧對老鼠係咪吖！？」
雖然我本來哭得梨花帶雨，但聽到Toby這樣說居然不爭氣的笑了一聲，然後又哭又笑地說：「唔係呀，仲講到自己好知我諗緊咩咁，又估錯哂！」
Toby也一笑然後說：「你夠膽話你唔係驚佢擔心？」
「係有小小…我係唔想你地三個擔心我…而且我無內疚囉唔該；事實係我同你地講左呢件事之後，你地即刻夾假期話同我去旅行散下心，我已經覺得好感動。但係呢段時間我不停係到諗，提出分手嘅係我，係，我地係和平分開，但係始終係我提分手先。我覺得自己好煩呀，我唔知自己想點呀，我前一秒好想分手，後一秒又諗緊阿葛。我……」我本來還是有點失笑，但越說越激動，竟然又一次哭起來。
Toby輕輕帶開我，大字型躺回床上。「咁咋下話…我都唔記得添，阿葛係你初戀呀可？」
Toby這麼一說…我彷如夢中驚醒一樣。和阿葛兩年間安穩的感情，使得我都忘記了自己還是頭一回拍拖。
但…這又如何？
「你到底係掛住佢所以諗佢？定係覺得自己好衰所以先諗佢呀？」Toby一邊說，一邊鋪好床鋪睡覺。「覺得自己提分手先好衰？覺得自己始亂終棄係賤人？我話你知，如果你唔鍾意佢都仲同佢一齊你就真係衰喇。我地呢啲旁人你更加唔洗擔心，無論你決定係點我地都一定會支持你。你唔好諗咁多野，淨係問自己一句得喇，你到底想－唔－想－分－手？」Toby雙眼早已合上，只差還未打鼻鼾。「你有一晚時間慢慢諗，希望聽朝見到答案…早…抖。」
或許Toby是對的，問題真有那麼複雜嗎？還是說我這個戀愛初哥把問題變得複雜了？
－完－