【真人真事改編】《去年暑假，我在街上賣寬頻。》: 《去年暑假，我在街上賣寬頻。》（十二）

　　「你知唔知呢單嘢衰咩？」浩哥讓我反思，其實昨天面對那位議價師奶已經費盡唇舌了，真的不知道還可以怎樣使她屈服，只好回答一句：「唉，要講嘅都講咗，可能係我唔夠靚仔啦！」浩哥慨嘆了一口氣，說道：「做Ｓａｌｅｓ做到要靠個樣嚟搵食，就唔係一個真正嘅Ｓａｌｅｓ啦！我哋靠把口搵食㗎嘛！你尋日Ｐｒｅ（Ｐｒｅｓｅｎｔ）嗰陣犯咗兩個大錯！」「吓！唔係啩！我好小心冇講錯嘢㗎喎！」我自問記憶力強，對服務價錢及內容細則也是倒背如流的，怎麼會犯下大錯，還要不止一個？
 
　　「聽我講啦，第一，你講完第一句之後已經炒咗一半，你唔應該一開始就介紹最低價格嘅Ｐｌａｎ畀人，無論咩客都好，佢哋個心態當然就係想『平靚正』，特別係啲師奶，點都會習慣性問你一句有冇得再平，咁如果你一開始就已經開我哋最平嗰個『＄１２８』Ｐｌａｎ畀人，你就冇得走位！」浩哥很有條理地解說。
　
　　「咁啲客又係想平嘅！不過，我應該點樣走位？」「人哋雖然係『公屋特選客戶』姐，唔代表你一開始要免四個月月費畀佢，你可以開『私樓價』免兩個月月費嘅Ｐｌａｎ畀佢先，佢九成九會嫌貴，當佢個樣唔太情願嗰陣，你即刻出絕招同佢講──『嗱！呢位靚太，係唔係即時登記先？係嘅話我可以做到免四個月月費畀你，仲送多你＄３００萬靈現金劵』，通常呢個時候佢哋對眼就會發哂光，覺得你係至抵價，就會同你簽約，如果你一開始介紹最Ｃｈｅａｐ個Ｐｌａｎ同埋講哂送咩贈品出嚟，人哋唔Ｂｕｙ你嘅話，你點有籌碼同佢傾落去啊傻仔？」
 
　　「咦，你又講得啱喎，點解我一開始要咁『老實』？另外，我仲有咩錯失呢？」「嗱，第二，其實你第一個動作應該要『Ｃｈｅｃｋ Ｃｏｖｅｒ』先！我第一日喺黃大仙開工個陣已經提咗你㗎啦！你唔打『１６８１６８』上公司問個客層樓同佢單位有冇覆蓋，又最多可以裝到幾高速上網嘅話，點樣Ｓｅｌｌ啊？萬一遇到個客佢想裝『１０００Ｍ』，但佢個單位只係裝到最高『５００Ｍ­』，唔通你又同佢開張『１０００Ｍ』咩？我以前就因為Ｃｈｅｃｋ唔清楚，搞到個客被逼轉Ｐｌａｎ，之後個客投訴我呃佢，搞到冇咗張單嘅佣金。所以，咪話我唔提多你一次，『知己知彼，百戰百勝』啊！」
 
　　浩哥電話中一席話，可謂勝過實戰十小時，雖然我們要對客人說些「美麗的謊言」，但這也讓他們有選擇空間，簽約與否，任君定斷，也不算是存心欺騙吧！不過，與客人三句未到便要Ｃｈｅｃｋ Ｃｏｖｅｒ，開門見山問其住址，雖然效率最高，但是始終感覺尷尬，特別在香港這個爾虞我詐的城市，人人著重私隱，小心翼翼，若要人家自願報上地址讓你推廣服務，除了好好提升銷售技巧之外，恐怕還要加強臉皮的厚度了！
 




【　敵不動
　　自己不動
　　厚面皮
　　一刀剌進都不痛
　　危難中兒童
　　撞冰山的郵輪
　　難煽動我又滿面愁容

　　〈反高潮〉 陳奕迅　】