【真人真事改編】《去年暑假，我在街上賣寬頻。》: 《去年暑假，我在街上賣寬頻。》（十一）

　　「咦？Ｐａｕｌｉｎｅ，好耐冇見啦！你又會喺呢頭出現嘅？」我驚奇地問。「哦，係啊，自從中五畢業之後都冇見過面，我搬咗嚟呢頭住吖嘛，冇聯絡咁耐，你唔知都正常嘅！我啱啱喺Ｆａｃｅｂｏｏｋ見到你話會喺呢個位置做嘢，咪過嚟打聲招呼囉！哈哈！」身穿運動服裝的她，語氣依舊開朗。說來也是，昔日的中學同學，升上大學以後，各有一片新天地，又有多少人能夠保持聯絡呢？若然能互相在社交網站中間中關注一下，讚個好、留個言，或許已經很不錯了！
 
　　「哈！真係估唔到你變咗馬鞍山嘅朋友，咁你近牌點啊？」其實，我連她讀什麼大學什麼科系也不清楚，甚至不肯定她是否仍然在學。「唔知你有冇聽人講過啦，我由Ａｓｓｏ駁返入大學啦，讀到最鍾意嘅體育系，算係完成咗自己一個心願囉！」「喂！恭喜哂喎！記得你以前中學陸運會都攞唔少金牌，我都覺得呢科幾啱你吖！」「係就係啱我，不過我爸爸媽媽都唔想我讀體育囉，話冇咩前途喎，仲話唔明女仔人家讀乜鬼嘢體育，遲早搞到自己變成『男人婆』，差啲逼咗我Ａｃｃｅｐｔ第二個商科Ｏｆｆｅｒ，好彩我堅持到底咋！」
 
　　「竟然咁大件事？但係你而家都留住把長頭髮，幾靚女噃，點會似男人啊？我就話最緊要都係睇自己興趣，唔好畀社會風氣拖住走，好似我嗰陣放完榜排Ｊｕｐａｓ，好多人話我都考得幾好，做咩唔排啲『有錢途』嘅科喺頭三志願，反而要去讀中文，但係我由始至終都冇改變過主意，而家讀咗兩年，好開心，學到好多想學嘅嘢，完全冇後悔到！所以，好好享受大學生活啦！」我加以肯定她的選擇，在香港這個商業社會，要拋開功利主義，堅持理想，真的不容易，況且就連家人也不支持？我突然覺得自己很幸福，因為母親一直以來都很鼓勵我去做自己喜歡的事。
 
 　　 「我會努力㗎啦！我而家要過去對面運動場練跑啦，第日再傾吖！」「好！唔阻你先，加油！」「你Ｓｅｌｌ寬頻都要畀心機啊，祝你開多幾張單，拜拜！」沒錯，現在對我來說，最重要的，除了開單，也是開單，這區是我成長的地方，理應乘著地利好好打一仗！
 
　　「香江寬頻介紹番！」、「錦豐苑、頌安邨有特選住戶優惠喎！」、「登記服務送韓國最新Ｓ－Ｐｈｏｎｅ ３啊！」輪流呼喊了幾百句，才有一位師奶走來用不咸不淡的廣東話詢問：「阿哥哥仔，而家上網最平幾錢？」我先反問：「小姐，你好，咁請問你住邊？」她驚訝道：「吓？問下價錢姐，都要查家宅㗎？」我便解釋：「哦，唔係，因為唔同屋苑會有唔同優惠，如果係居屋同公屋會比私樓平啲啲，所以要知你住邊度先講到最平價錢你知。」
 




　　她猶豫了數秒才肯答：「就住頌安姐嘛！咁最平幾錢？」我便拿起彩印的銷售圖冊細心講解：「嗱，如果『１００Ｍ』網速純上網，月費本身就＄１６９，簽兩年約，公屋住戶送你四個月月費減免，加埋＄３００『萬靈』現金劵，平均每月就＄１２８最平。」她聽罷沉思了一會，再問：「一定要簽兩年約㗎？簽一年得唔得？」這個問題真的有趣，我便答道：「唔好意思啊，每個服務都要簽至少兩年約㗎，但係我哋會減你四個月月費，姐係你畀二十個月嘅錢就得。」
 
　　「咁我唔要你＄３００『萬靈』現金劵，再免多我兩個月月費得唔得呢？我都唔去『萬靈』買嘢嘅！」她言語令我有點兒吃驚：「小姐，你呢個真係一個唔錯嘅建議，不過呢，服務內容就規定最多減四個月，所以真係幫唔到你喎！」「如果冇得再減月費，咁你有冇多啲現金劵送啊？」原來，師奶真的會不斷跟你討價還價，但我不是賣菜的菜販啊，怎麼可以讓你「買菜搭條蔥」呢？
 
　　「真係唔得啊小姐！公司規定咗送現金劵嘅數量，其實呢個價錢，真係最平，係特選住戶先有，如果私樓嘅話，只係減兩個月月費咋！」「咁我返屋企問下個仔先啦，橫掂仲有成兩個月先合約到期，拜拜！」然後，她便頭也不回地歸家去，望著其漸遠的背影，一時無語問蒼天，心想：我的母親是不是也像這位師奶般「精打細算」呢？
 
【 穿西裝 趕返工 到處都講魄力 統統逼我去爭競
出新機 供新屋 到處都講價值 統統逼我去追戰績

〈逼〉 Ｄｅａｒ Ｊａｎｅ】