【真人真事改編】《去年暑假，我在街上賣寬頻。》: 《去年暑假，我在街上賣寬頻。》（十八）

　　邦哥差不多下午四時才開壇，怎料他不消半個小時，便成功開了師奶一張單，令我目瞪口呆，心想：「喊出嚟！點解我企咗兩粒幾鐘，一個客都拉唔到，而佢遲到兩粒幾鐘，唔洗半個鐘就有斬獲？真係好唔公平！」不過，人家是綽號「獵人」的Ｔｏｐ　Ｓａｌｅｓ，絕對是有經驗與實力的。
 
　　「嘩，邦哥，你就好啦，咁快開齋！我就拍烏蠅，你唔會開咗一張單就即刻返歸啩？」我帶著羨慕的語氣問。「哈哈！咁我又唔會咁快走人，嚟開工冇一個鐘就閃，咪車錢都蝕鬼埋？有早數嘅話，梗係希望夜晚梅開二度，就好似尋晚意大利場波，上半場入一粒，下半場乘勢入多粒，輕鬆收錢！」他沾沾自喜道。
 
　　「喂！我尋晚都跟你買咗五十蚊，多謝教路先，今晚記得再醒啲心水貼士畀小弟啊！」「一陣坐喺到慢慢度下波啦一齊，我都唔係話次次中，不過你想跟就跟啦！我而家就去食個下午茶，順便去馬會攞返幾百蚊先！如果一陣有人問價，你就叫佢打我卡片個電話，我會趕返嚟！唔該哂！」我小伙子初出茅廬，還是第一次接人家公司卡片，感覺新鮮，但令我驚奇的是，原來我們這些企街的Ｓａｌｅｓ，也會有精美的聯絡卡片，不過就要像他有「高級營業代表」這個「高級」名銜囉！
 
　　突然，「諾飛亞３３１０」響起，令我不寒而慄，沒有客人問我拿過工作電話啊！想了一秒，噢！已經知道是誰打給我了──「喂？係咪堅爺？」我淡定地接了電話。「偉仔，你點知我會打畀你？」堅爺有點詫異。「冇，因為我都未留過電話畀客，又冇卡片派，一定係公司或上頭打嚟㗎啦！」我答得頭頭是道。「冇錯吖！你估啱咗，不過你知唔知我點解要打畀你啊？」我其實也估到他想催我交數，不過裝作不知，他開始暴躁了：「開單未啊？返十日工先得一張單！都唔知你哋Ｔｅａｍ人搞邊科，得嘉寶開到幾張單，你新丁有一張都冇咁衰，嗰嗰Ｌｅｏｎ呢，夠膽死到而家都未開單，頭先先插完佢一輪……」堅爺連珠炮發地罵罵罵，我只好硬食。
 
　　大半個小時後，邦哥吃完東西回來，看見我愁眉苦臉，說道：「嘩，做咩成個人冇哂精神咁啊？」「唉，頭先經理打嚟催我開單，煩到嘔！」「哈，呢行係咁㗎啦！我成日都話『有單就乜都得，冇單就乜都七』，你經理我以前跟過佢啦，佢叫『曹人堅』真係冇改錯名，因為佢真係『嘈人好堅』，不過我就當佢紙老虎！」「咁梗係啦，你Ｔｏｐ　Ｓａｌｅｓ嚟喎，開咁多單！」「哈哈，我一開始入行都係十日開唔到一張單，後來捱得住，咪越來越好數囉，一做就六七年，不過你都係大學生暑假嚟玩吓姐，輕鬆啦，捱上司鬧都係一種學習嚟嘅！」
 




　　過了一會兒，又有一個師奶來問邦哥價了，只見他立即從筆袋中拿出一副膠框眼鏡，將之戴上，展露微笑。其實，我昨晚也留意到他銷售客人時才會戴著眼鏡，但就以為他是近視，所以有此需要，不過為什麼眼鏡放在筆袋呢？不怕弄花鏡面嗎？
 
　　三兩下口舌功夫，他又開單，令我大為佩服，不禁向他恭維一下：「又未夠七點就梅開二度，威威啦！今晚又可以早走睇歐國盃啦！」「頭先個師奶外表雖然幾Ｙｏｕｎｇ，但竟然唔係用智能手機，所以簽咗張純通話Ｐｌａｎ，每個月幾十蚊月費咋，我都唔係話好有肉食姐！」「積少成多啦都，起碼又有單吖！不過我想問你一個問題──點解你Ｓｅｌｌ嘢嗰陣先戴眼鏡？到底你係近視定點？眼鏡放係筆袋唔驚整花咩？」
 
　　邦哥聽罷，脫下眼鏡，笑了一聲：「哈哈！我都冇近視，我扮斯文姐嘛！對住啲客，唔戴返副『假仁假義眼鏡』點得？」「嘿！咩係『假仁假義眼鏡』？多啦Ａ夢啲法寶嚟？笑死我……」「個名我老作姐！你諗下啲客唔識你，你第一眼畀人嘅印象係好重要，特別係啲以貌取人嘅肥師奶，戴返副眼鏡扮友善，成個樣都誠懇好多，變咗一條『懇樣』，畀到人哋信心，唔係人哋就覺得你係一條呃錢嘅『粉腸』……」「嘩！你做『懇樣』都做得幾成功吖，嘩！唔得，好好笑……」「想做『懇樣』好容易姐，嗱，我教你啦，一陣去『日之城十蚊店』，買返幾副平光鏡，每日睇心情換一副都得啊……」
 
　　邦哥幽默地說要「假仁假義」扮「懇樣」，雖然我認為有點兒誇張，出外工作時並不一定要拋棄道德，但他也說穿了社會生存之道。人際關係很奇妙，不懂人情世故，不會委曲求全，人家又怎會給你好處，繼而達致互惠互利呢？當然，這不是叫你去當「偽君子」阿諛奉承啦！無論如何，個人尊嚴與原則是絕不可失的！

 【　當初唱字母歌
　　學會的未算多

　　終於領悟更多
　　人跌倒又上一課 一課
　　校門即使逐一給光陰上鎖
　　都緊記當初

　　〈前程錦繡〉 許志安　】
 
Facebook專頁: 大雞小事 ( https://www.facebook.com/bigchickenlittlethings )