【真人真事改編】《去年暑假，我在街上賣寬頻。》: 《去年暑假，我在街上賣寬頻。》（四十三）

　　不經不覺又踏入七月最後一天，通常每區經理都會於月尾召集手下回公檢視業績。一看Ｅｘｃｅｌ表格，小弟於本月斷斷續續開了十幾張單，幫公司賺了幾萬元純利（當然是兩年總合約計），於本區五六十個Ｓａｌｅｓ之中排第「廿三」。雖然成績中游，但白紙一張做了兩個月，駐守二三線位置，又打了幾日風，也收貨了，沒有被堅爺「照肺」是最好証明。

　　接著，堅爺又講講我們月中接待神秘顧客的表現，開口便道：「我哋呢區整體評分係五區之冠，大家平均分有８１分，而最高分嘅兩位同事都喺我哋區，分別係９１分嘅Ｅｄｄｙ，同埋８９分嘅偉仔……」我一聽到自己的名字，真是極度興奮，因為這是對個人努力的一個肯定，而接待神秘顧客表現最高分的三個Ｓａｌｅｓ，會得到「服務用心獎」，獎品有一張獎狀，和五百大元獎金！

　　怎料數秒之後，堅爺補充：「Ｅｄｄｙ你係本月唯一服務用心獎得主，偉仔你就可惜啲，差一分……」我就問：「唔係最高分嗰三個人有得攞咩？」佢就答：「係啊，係最高分嗰三個，不過同時都要九十分或以上先有份！」我內心：「！＠＃＄％︿＆＊（），唉！」講多無謂，立即拿回評分紙看看有什麼項目被扣分，過目完畢，不禁憶起月中某天於大埔昌運中心Ｍ記門口的點滴……

　　夜晚七點左右，有位中年師奶過來問價，她踢著一對膠拖，身穿街坊服裝，依稀記得衫上印著「渣打馬拉松」字樣。我就用盡九牛二虎之力Ｓｅｌｌ服務，過程十分流暢，自己覺得沒有問題，但最後爭持不下，她說要問問老公意見，那麼我便留下電話予她，不過客人一走就別指望人家會吃回頭草了。
 
　　那時我覺得浪費了好多口水，但現在得悉她是神秘顧客後，慶幸當時沒有Ｈｅａ　Ｓｅｌｌ打發她離去呢！然後，我仔細審閱評分表，她在「形象儀容」、「攤檔管理」、「服務計劃知識及專業推介」、「解答異議」都給予我滿分，但於「銷售態度」一環，有兩項「４分」評分點都給了我「０分」，總共損失８分，原因是「有挑釁顧客，語言輕佻」，我真是「Ｏ哂咀」！為什麼會這樣呢？突然想起當時一個對答，就知道原因了……





　　她：「乜上網費用唔係越嚟越平咩？兩年前就＄９９，今年應該就＄８８啦！」我：「阿師奶，邊個同你講上網越嚟越平呢？你入去茶餐廳食個飯都貴咗啦，家陣樣樣嘢都通漲，對面Ｍ記而家「二十蚊餐」都變咗「廿一蚊餐」，上網兩年後先開始加價咪算係咁囉！如果你去Ｍ記用二十蚊買到個餐咁我送埋張約畀你又點話！」之後，她呆了三秒……應該就是這幾句累事吧，讓她覺得我「串串貢」，又或者，我稱呼她做──「師奶」，她懷恨在心，哈！

　　看到最後，方知她是個「中學導師」，組長浩哥笑言：「咦，好大牌喎偉仔，過咗兩個月，中學老師都畀你串返轉頭，不過唔緊要啦，八月再攞過獎囉……如果你仲未走，嘿！」他這是在說風涼說話呢！其實，我八月是應該拿不到獎的了，因為我大約工作多一個星期，便要離職，參加大學的迎新營了……
 
【　來吧快講 別大條道理
　　不修飾膚淺粗一點
　　我受得起

　　〈語言藝術〉　Ｒｕｂｂｅｒｂａｎｄ　】
 




Facebook專頁: 大雞小事 ( https://www.facebook.com/bigchickenlittlethings )