【真人真事改編】《去年暑假，我在街上賣寬頻。》: 《去年暑假，我在街上賣寬頻。》（四十九）
八月中的某個下午，那是我於旺角西洋菜南街告別戰的後幾天，我回到了葵涌邨禾塘咀街的工業大廈寫字樓，辦理離職手續。
在玻璃門外按了門鈴，人事部「古明華」Ｐｅｔｅｒ來迎接我，他以那獨特嬌柔聲線說：「偉仔，估唔到你都捱到兩個月暑假喎！仲以為你大學生做一兩個禮拜就頂唔住添！」還記得入職時他幫我處理文件，叮囑我工作小心，想不到這次見面我已快要道別了，我便道：「阿Ｐｅｔｅｒ哥，多得你嗰陣幫我好好隱藏學歷，唔係一定穿煲畀人發現我嚟做暑期工啦！今日又要麻煩哂你，哈！」
Ｐｅｔｅｒ帶我到會議室，填妥幾份文件，對好積分薪金，簽了十幾個名後，便交還了員工証、制服、紙壇與易拉架，就這樣，我離任了。然後，收到浩哥電話，叫我到樓下的「溫莎堡茶餐廳」吃個下午茶。我走出辦公室大門，回望一眼「香江寬頻有限公司」的藍色大字與商標，便進了電梯，不帶走一片雲彩。
甫踏進餐廳，兩個月前首次光顧的情景又重現眼前──中間走廊儼如楚河漢界，劃分了在外的非吸煙區與在內的吸煙區，然兩區都坐滿了食客。浩哥一定坐在吸煙區的卡位，我自然步近之，想不到，座上不只浩哥，還多了一個稀客──堅爺。
「咦，經理，你又咁得閒嚟食下午茶嘅？唔洗落區巡下其他手足咩？」我帶點驚愕地問。「哈，請埋你食個嘢先去巡都未遲，我習慣每個手下離職都請佢食飯餞別……」堅爺抽著煙說。我心諗：「唔係啩？我冇聽錯吓嘛？堅爺係咁好人，咁有情有義嘅咩？」「快啲坐低叫嘢食啦，堅爺請唔係咁唔畀面啊？」浩哥笑言。雖說有點兒尷尬，但不管了，反正一場來到，吃他一餐也抵，還點了個最貴的下午茶──乾炒牛河配凍檸茶，嘿！
我不敢主動說話，怕漏了口掀穿自己身份，怎料堅爺竟問我：「偉仔，大學畢業之後有咩搞作，有冇話想入邊行？」我呆了三秒，望一望浩哥，答道：「嗯……工作呢家嘢讀埋最後一年先諗啦，我比較鍾意自由性質嘅工作囉，其實Ｓｅｌｌ寬頻都幾啱我，哈哈……不過，你點知我係大學生㗎？浩哥同你講㗎？」
「傻仔，我話哂都係分區經理，你啲入職文件都有過目，一睇你公開考試咁高分就知咩事啦，之前我未升經理做組長嗰陣，都有啲手下係讀緊書，知你短做有咩咁出奇？我一早問咗阿浩你背景啦，冇咩嘢嘅，搵下零用錢姐，最緊要你交到數，你呢個月人工都有過萬，ＯＫ㗎啦！」堅爺笑言。他今日好像特別友善，令我很不習慣，上兩星期開不了單才打來「捽數」，還夾雜了兩句粗口，現在竟然好像頗讚賞我似的，真的有點不自在，唯有微笑點頭回應。
「偉仔，其實做分區經理都好難做，你估我想催你哋數咩？我呢啲角色，講句好聽啲手下幾條Ｔｅａｍ，有五、六十個馬仔，但面對住我啲Ｄｉｒｅｃｔｏｒ級頂頭上司，咪又畀佢哋逼住要提升業績？生意呢家嘢梗係只可升不許跌……唉，下面班手足都想佢哋搵多啲，要好好管理住，真係少啲精神都唔得，夾心階層唔易做啊……」堅爺開始吐苦水，其實，當人處於不同角色、不同高度，自然是有不同立場的，我漸漸明白經理的難處，畢竟，沒有一個崗位是沒有壓力的。
「講咗咁多，希望你明白我啦，我有時覺得你言談間都有啲內涵嘅，唔似我其他Ｔｅａｍ一般ＭＫ仔，份人比較倔強，而家啲大學生係咪仲係咁串？……不過你肯出嚟日曬雨淋算好，後生仔捱下囉，唔辛苦邊得世間財啊？……好啦，唔講啦，去睇下其他兄弟先，第日你畢業之後想入返公司做文職，咪幫你搭下路囉！」堅爺苦口婆心，像一個老師向我循循善誘，與他以前惡言相對有太大反差了，使我有點感動，我跟他道別，然後他到櫃檯結了賬。
此時，座上只餘我和浩哥，我便跟他道謝：「呢兩個月多謝你，我學到好多嘢，我冇諗過自己可以堅持到兩個月，其實一開始畀你同堅爺追數，壓力真係好大，我考高考嗰陣都冇爆頭嘅感覺，但有時催谷一下，又可以發揮到潛力喎！而家我份人係外向咗，冇以前咁被動，口才仲好咗，哈！」
浩哥微笑卻又帶點感慨說：「我做咗呢行咁耐，你Ｓｅｌｌ嘢都算係最斯文嗰個，可能因為你讀中文系啦！一開始你太正經，表達係好清晰，好似補習老師咁，但冇咗Ｓｅｌｌ嘢個種Ｆｅｅｌ囉！好彩後嚟阿志龍同埋振波教你兩招，之後你就開始識玩啦，講嘢有趣咗，又識捉客人心理，而且唔係呃人，所以你係值得有佣金出嘅！」
臨別依依，我們互相拍了拍肩膀，期望他朝有緣能相會。我知道浩哥快要抽煙，會從口袋中拿出一個Ｚｉｐｐｏ銀鋼打火機，便下意識地把它接過手來。他拍拍煙盒，抽出一根「黑冰」，我便單用右手手指彈開機蓋，隨即燃起了一點火花。他深深地吐納一口，煙氣縈繞，把我的靈魂吹回一年後的六月……
【 如煙 因給你遞過火
如火 卻也沒熔掉我
〈不來也不去〉 陳奕迅 】
Facebook專頁: 大雞小事 ( https://www.facebook.com/bigchickenlittlethings )
特別鳴謝插畫師:「Nothing Serious」( https://www.facebook.com/nothingseriousfans )