【真人真事改編】《去年暑假，我在街上賣寬頻。》: 《去年暑假，我在街上賣寬頻。》（五十）【大結局】

　　「喂！偉仔，做咩發呆啊？」浩哥吐出香煙後問，把神遊於上年暑假的我拉回現實，我回過神來答道：「冇，諗返起上年暑假賣寬頻好多往事姐，哈哈，真係記憶猶新！」然後，便將Ｚｉｐｐｏ打火機還給他。
 
　　「係呢，其他隊友點啊？仲有冇做Ｓａｌｅｓ？」我關心昔日Ｔｅａｍ　１８同事的近況。
　　「佢哋啊？你話繼續Ｓｅｌｌ寬頻嘅就得返阿志龍咋喎，不過就轉咗去『線上遊』做。振波同嘉寶呢，就去咗金行賣金，聽講收入都幾穩定，你知彌敦道幾多『自由行』㗎啦！」浩哥答道。
　　「咁阿文叔同Ｌｅｏｎ呢？」我續問被辭退組員的下落。
　　「文哥早牌喺旺角某間茶餐廳撞到佢，同個客Ｓｅｌｌ緊保險，咪打咗個招呼囉，原來佢都幾多佣金賺，好多大陸親戚朋友幫佢買，因為香港啲保險係有保障少少……而阿Ｌｅｏｎ條衰仔，兩個月前先結婚，我哋成班中學死黨都去咗飲，佢而家識諗好多，跟人做地盤，自力更生，人工唔差，遲到都少咗，唔洗做『遲到王』，可能結咗婚之後有返啲責任感啦！」浩哥再分享。
　　「咦！咁幾時輪到你結啊組長？」我奸笑問。
　　「結咩先？腎結石就有份，哈哈！」他說了一個玩笑。




 
　　「好啦，浩哥，我要做嘢先，今日要Ｃｈｅｃｋ多兩間舖，得閒就再約出嚟飲嘢吹水啦！」與浩哥談了大半個小時，是時候要繼續巡察下間商店的香煙銷售情況了。「嗯，咁就下次再見啦，記住好好讀埋個碩士佢，將來大把世界，發咗達記住請『小弟』我食飯啊！」浩哥拍拍我肩膀道，眼神帶著希冀。
 
　　他繼續在大圍站Ａ出口的通道外派樓盤傳單，我繼續做兼職任務，準備到公共運輸交匯處乘坐８０３Ｋ小巴到顯徑邨工作。下午三時多，太陽仍不減暑氣，熱得我汗流浹背，感覺正如去年暑假，在街上賣寬頻那樣，勤奮而艱苦，卻又相當快樂。
 
　　青春無悔，歲月輕狂，未來還有很長的路要走。我慶幸能在２０１２年經歷了這麼一段特別的日子，我想我永遠也不會忘記──「去年暑假，我在街上賣寬頻」……
 
【連載完畢，多謝支持！】
 
Facebook專頁: 大雞小事 ( https://www.facebook.com/bigchickenlittlethings )




特別鳴謝插畫師:「Nothing Serious」( https://www.facebook.com/nothingseriousfans )