(純愛、洋蔥、懸疑)她從A片走出來(舊名:我女友竟是田中美佐)(更新至結局): Chapter 64

Chapter ６４
 
門敞開，田中撲入我懷中尖聲大叫，手指向電視。
 
我們循田中所指方向瞧去，電視正在播放十三號星期五的電影，戴上面具的傑森正拿起電鋸大開殺戒，電視不斷發出電鋸的開動聲、電鋸磨擦著骨頭的聒噪聲、人們痛苦的呻吟與慘叫。
 
申氏夫婦被田中突如其來的舉動嚇呆了，片晌，申生才問道：「阿淳點解會咁嘅？」
 
我憶起了記事薄內田中害怕及討厭的東西，應道：「田中好驚電鋸聲同埋傑森面具，每次有依啲嘢喺佢面前，佢就會好唔妥。」
 




申生把電視關上，我撫著田中的背，安慰道：「熄咗啦，唔駛驚，妳睇，咩都無咗喇！」
 
田中臉色煞白、急喘著氣、身子打著顫，申太見狀，徬徨又心痛，哽咽道：「爸爸，阿淳依幾年一定受咗好多苦，佢一定發生咗好多唔開心嘅事。」
 
申生的表情也變得肅穆起來，摟著申太，道：「阿淳，可能患咗創傷後遺症，我地聽日搵Doctor Kok睇下。」
 
申太牽著田中的手，道：「阿淳，妳今晚同媽咪一齊瞓。」
 
田中甩開申太的手，搖著頭，躲在我背後。
 




「阿淳，我係媽咪啊！妳做咩啊？」
 
田中兀自躲在我身後，我道：「申生，不如你地返房先，等我留係度陪田中喔！」
 
「我點可以畀你同阿淳一間房啊！」申太抗議道。
 
「我向你地保證，今晚一定唔會有你地唔想見到嘅嘢發生。」
 
申生與我對望了一眼，這一刻我們兩位身份、年齡、背景相差極遠的男人，建立了互信，申生道：「媽咪，我地出返去先。」
 




申太瞧向我與田中，再瞧著丈夫，道：「爸爸，但係…」
 
申生離開前，向我頷首。
 
我坐在床前輕聲唱著田中教我的日本童謠──紅蜻蜓，不知為什麼日語爛透的我，居然很快便學會這首日本童謠。
 
田中雙眼半開半閉，我柔聲道：「想瞓就瞓啦！仲乜唔瞓？」
 
「我…好…驚…」
 
「仲驚？都熄咗電視咯！」
 
田中搖著頭道：「我…唔…係…驚…嗰…啲，我…驚…你…走，唔…要…我。」
 
我撫著她的臉，笑道：「傻妹嚟嘅，點會呢？我驚妳唔要我咋。」




 
田中握著我的手，道：「上…次…我…跑…步，贏…咗，你…話…跑…贏…嘅…人，可…以…要…輸…嘅…人…做…一…件…事。」
 
「有啲咁嘅事？咁妳要我做咩？」
 
「你…唔…可…以…揼…低…我。」
 
我聞言有感動得眼泛淚光，我實在想不到像我這一種人在田中的心中居然有著如此地位，我道：「唔會，一定唔會。」
 
未幾，她發出輕輕的呼吸聲，顯然已進入了夢鄉，她入睡時，仍然握著我的手，彷彿只要一鬆手，我便會永遠離開她。
 
田中睡著，我的任務完成，我輕輕鬆開田中的手，為她蓋好被子後，我離開了她的房間。
 
在房門前，我遇上了申先生，申先生現出嘉許的神情，點了點頭：「你無令我失望，跟我嚟。」
 




我隨著申先生，他把我領到書房，我們迎面對坐，他取出了支票薄，道：「我畀二百萬你，你以後唔好再見阿淳。」
 
我還以為申先生已經對我改觀，豈料我的表現只是令我本來得到一百萬銀碼的支票改為二百萬。
 
我再度拒絕了我這一輩子也賺不了的錢，道：「申先生，我諗你誤會咗我，我同田中一齊唔係為咗錢，我真係鍾意佢。」
 
「佢唔係咩田中，佢叫申韻淳，係我申雄何唯一嘅女兒。」
 
「我唔理佢叫田中美佐又好，佢叫申韻淳又好，佢叫咩名都無所謂，我都係咁愛佢。」
 
「我比你更加愛佢，我先係依個世上唯一會對佢無條件付出的男人，其他人愛佢，係有目的、希望得到回報，依啲人最後會離開佢、會傷害佢，但係我唔會。」申先生激動地道。
 
我瞧著喘著氣的申先生，想到一句說話，世上每一位女兒的父親，前世都是一位負心漢，所以今生他要用一生的愛，去彌補他上輩子辜負了的情人。
 
我嘗試說服申先生，道：「申先生，請你相信我，我真係好愛田中…唔係，係阿淳。」




 
「我相信你好愛佢，但係你唔可以令佢幸福，或者咁講，你自以為畀到嘅幸福，但係喺佢心目中一啲都唔幸福。」
 
我急道：「申先生，請你相信我，我一定會好努力裝備自己，我依家轉咗做文職，夜晚去讀書，我會努力去拉近我地之間嘅距離，我會畀到幸福佢架。」
 
申先生牢牢地瞪著我，一字一頓地道：「你打算用幾多時間拉近你地之間嘅差距？十年？二十年？你有把握可以畀到阿淳依家嘅生活？佢間房都大過你間屋啦！後生仔，老土啲講句，你地係生活係兩個世界嘅人。」
 
「但係…」
 
申先生斷言道：「後生仔，你聽我講，你未做過人父母，你唔會明我感受，我真係唔忍心將唯一一粒女交畀你，要佢同你一齊捱，一齊住係品流複雜嘅公屋，佢遇到意外，失去咗記憶，遇上咗你，你喺佢人生中最低潮時，幫助佢，令佢感激你，產生咗一啲微妙嘅感情，但係佢喺失憶之前已經擁有一個完滿嘅家庭；一對疼愛佢嘅父母，已經為佢將來舖好一條康莊大道，而且佢已經擁有一位青梅竹馬嘅情人，將來佢地會延續幸福嘅傳說，組織一個美滿嘅家庭。」
 
申先生最後的那一句說話震撼著我，原來田中在失憶之前已經有一位等待她的王子。
 
我感到我的靈魂有一剎那離開了我的軀殼，良久才道：「嗰位將來同佢組織家庭嘅係邊一位？」
 




「你都見過嘅？」
 
「圭司？」
 
「無錯。」申先生道：「所以呢？後生仔，我好多謝你係依段時間照顧阿淳，我都知道你係好愛佢，依個世界上有一種愛叫做放手，如果你真係愛阿淳嘅話，請你放手，畀佢幸福，開始嘅時候可能會好痛苦，但係時間會係最好嘅止痛藥，你收咗張支票，忘記阿淳。」
 
我沒有收起那張支票，這一刻我像失去了靈魂的行屍，我不知怎樣離開了申氏大宅。


以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl