2011年7月5號,如果我冇接到我個fd電話、如果我冇應承陪佢玩勁舞,如果我冇表白……

當時嘅我,作為一條不折不扣嘅死毒撚,除咗打機就剩係識打飛機。嗰晚大概8點幾,正當我打信長打得興起之際,電話就響起……

電話另一端傳嚟我少數男性朋友之一,阿偉嘅聲音:「喂,開勁舞幫我解任啦。」

「打緊信長呀,一間先啦。」你解任邊緊要得過我輸贏呀。

「走場啦,等你咋,最多send埋個外掛俾你啦。」



雖然成場嘅成敗關鍵落係我身上,但聽到勁舞外掛,始終受唔住誘惑:「得,即到,msn俾咗個掛嚟先!」

收完,解壓縮,安裝都用咗成半粒鐘,講到十萬火急,萬幾人等住我救命咁原來都係得個吹字,不過我大人有大量,我原諒佢。

入到阿偉嘅場,除咗佢之外,得一個女user,叫靜(隨名附送n個符號,唔識打)。毒撚雖然現實怕羞啫,但係網上世界就係我主場架啦。

於是我睇完佢堆遊戲資料之後就厹上身:「靚女,俾你電話地址msn嚟好嗎?」

阿靜:「收皮啦。」「偉偉,你識佢架?」



偉偉?唔係阿偉條女掛,屌,佢咁嘅樣都有女,冇天理呀!當然,呢啲都只係我嘅猜測,要知真相就梗係問當事人啦。

嘟…嘟…嘟……

「喂,仆街仔,個個阿靜你條女嚟架?」

「我都想係呀!佢係我個團入面啲人嚟,入嚟幫我解任咋麻。」聽住佢把聲由一開始邊講邊淫笑,到之後開始有啲失落,我敢肯定呢條友仔係對阿靜有意思。

「嘩,你笑得咁淫,個阿靜好索架咩?」呢啲咁低級嘅套料方法真係幾out都有人受。



「佢msn同fb張相係囉,最衰佢好似唔過電咁啦。」

其實明顯係你個樣太柒所以人哋同你過唔到電啦。

由於收夠料,所以我就收咗線。

可能你會問,點解唔直接問埋阿偉拎阿靜msn同fb。咁係因為我覺得如果唔係本人親手俾,拎到都冇意思,反而我一開場就俾個咁嘅壞印象佢,拎到加咗分分鐘都只有反效果。

加上當時嘅我都只係玩下嘢嘅心態,跟本就冇諗過真係拎佢msn,志在引下人注意攪下事咁解。

到之後人齊開場,玩咗陣發現……頂,全場個個都開掛嘅喂,攪到我個排名升都冇升過。不過好彩嘅係,包尾嘅係阿靜。

「好彩有人包尾啫!」作為一個打字凶狠嘅死毒撚,梗係要揶揄佢一下啦,叫我收皮咁串丫嗱!

阿靜:「我唔係下下開掛架,似你咩!」



頂,咁嚟俾佢串返轉頭,叫我情何以堪呢。我哦完阿靜一聲之後,就同阿偉吹水轉移視線。但男仔吹水唔係打機就係女神架啦,機就打緊啦,咁咪講下大家同女神點囉。

我同阿偉講起女神就嚟生日,應該送咩好。呢個時候阿靜竟然加把埋嚟:「佢鍾意啲咩架?」

出奇地唔同我唱反調,荒唔係想陰我咩!不過唔係丫,如果佢嘅提議有問題,我唔買咪得囉,聽下冇死架。

「史迪仔。」

阿靜:「咁買隻毛公仔俾佢囉,佢應該鍾意。」

嘩,佢唔係好唔妥我架咩?咁快轉性?

之後幾場,我同阿靜都冇玩到,停咗係到私聊,我有我講女神,佢就俾意見。傾傾下講起哈利波特,而咁啱個期上映緊【死神的聖物2】,由於知道女神鍾意睇哈利波特嘅關係,梗係諗住約佢去睇架啦,不過原來阿靜都鍾意,可惜冇朋友陪佢。



於是我就話:「不如咁啦,如果女神唔陪我睇,我同你去睇啦。」

阿靜:「um…睇吓點先啦。」

我:「嗱,我冇企圖架,只係…你知啦,佢個結局3D架麻,唔入戲院睇冇咁吸引架,但如果自己去,買飛個陣望住排隊嘅人個個都一雙一對,然後俾個售票員掃視完你周圍一輪之後,用個種帶住恥笑嘅聲線問你幾多位嘅時候,你答一位係幾咁樣衰呢。分分鐘排緊隊啲人聽到都忍唔住笑你,一個人返屋企等出碟啦,你話個陣幾慘呢。反正大家冇人陪,一齊去啦。」

阿靜:「咁等你約唔到女神先算啦。」

我:「咁不如你俾你fb我,咁咪唔洗靠係勁舞到等大家on囉。」

阿靜:「chingyan lam」

我:「加咗啦!我係cheung chun hang。」

係呢個時候,阿偉已經解完任,時間又唔早,係同阿靜講完聲要落線之後,就熄咗game啦。



呢一晚,我諗都冇諗過,阿靜會係我生命中佔一席位……

《如果認識你是錯誤,我願意一錯再錯……》