一次無心嘅表白，竟然令到佢同咗我一齊: 第二章

第二日，我打開facebook諗住睇下阿靜個wall有咩好睇，點知都係得啲讚好嘅嘢，仲悶過我……不過又唔算冇嘢睇嘅，起碼係佢啲讚好入面，知道佢好鍾意k-pop。 

之後阿偉又打嚟：「打信長啦。」 

「得，01ser等。」之後就收咗線。望咩啫，唔通同男人傾電話講心事咩。 

係game入面，阿偉一邊打一邊問我同阿靜噚晚傾咩。作為一條不折不扣嘅仆街，我梗係冇提起意圖約佢出街呢件事啦。 

「冇呀，都係講下女神咋麻。」 



「攪錯呀，你乜料都冇套到呀？」 

「我做乜無啦啦要套佢料呀？你要溝人就親身問啦，我秒秒鐘幾億上落，得鳩閒幫你咩。」 

「幾億？精呀？好心你打少陣飛機啦咸濕仔。」 

屌，比個色狼話咸濕，就好似有個精神病人走埋嚟話你有精神病一樣，who fucking care！

雖然打緊信長，但其實一邊開住勁舞，間中留意下阿靜有冇上線。做乜咁留意佢有冇上線？擺明想r水吹啦，唔通想溝佢咩？ 



點知又係打到一半嗰陣，阿偉話：「喂，阿靜上咗線啦，去玩勁舞啦！」 

「唉，佢真係慘，俾你個變態咸濕仔睇中，連打機都睇實佢有冇上線，除咗願主祝福佢都唔知講乜好！」 

係抱住純粹想搵人吹水嘅心態，我依依不捨地離開信長之野望（幾時出現呢句嘢，玩家們你懂的）。 

如是者，係跟住落嚟嘅幾日我同阿靜上勁舞都係吹水多過玩，我對佢嘅了解已經遠遠拋離咗阿偉。可能大家會覺得我真係好仆街，明明兄弟開聲先我都照爆陰毒，之但係我冇理由為咗呢個兄弟而不顧我細佬嘅死活架。大家都明白，男人從來唔係靠個腦嚟控制自己嘅行為架啦！

由於阿偉好多任要解，所以幾日嚟除咗我同阿靜，仲有一個長期係到陪我哋解任嘅女user----momo。我同阿靜當然唔會剩係活係個私聊嘅世界啦，得閒都會同佢哋吹下水。 



有一次，momo突然私聊問我:「你同嗰個阿靜情侶嚟㗎？」 

「吓，點解咁問嘅？」 

「呢幾日見你哋都係企多過玩，好奇問下咋麻。」 

仆街啦，外人都咁睇，阿偉咪…… 

「唔係呀，我同佢講下女神咁咋麻。」 

「你有冇msn？」 

「有。」 

「俾我。」 



過咗陣，msn顯示咗個朋友邀請，又係一個靚女頭像，深明自拍信唔過呢個道理嘅我，都只係當佢係個男人咁對待算啦。 

「你鍾意嗰個阿靜呀？」 

「佢想下好啦，本大少咁易鍾意人㗎咩！」 

「你眼角好高？」 

「唔係呀，要咁靚做乜啫？太靚咪又係成班厹圍係身，同靚女拍拖嘅愛情危機感太高。」 

「嘩，你睇到個個靚女都好似發姣咁架！」 

「sor，事實係就算豬排都會發姣。」 



「唓……」 

呢晚之後，我開始同momo，阿靜msn。子華哥話齋，網絡嘅發明，都係俾你cyber relationships ，腳踏n船㗎啫！何況，我又冇（未）踏。 

《男人唔識點去抗拒一個女人，由其一個主動嘅女人……》