一次無心嘅表白，竟然令到佢同咗我一齊: 第八章

慶幸msn有得將狀態較為忙碌，暫時可以避到momo條問題。但係避得一時唔避得一世，比著平時我有一煩惱我一定會搵我班姐妹（軍師）傾，之不過，關乎到女呢家嘢，如果同chloe傾即係斷自己後路！係呀，我認我係一條不折不扣嘅死仆街，但如果我咁蠢，自爆嘅話，我應該係仆街都不如。

即使可以同其他同chloe唔熟嘅人傾，但跟據我地獄黑仔王行衰運嘅pattern （係呀，你冇睇錯呀，我係黑到有個pattern係到，次次都係倒模咁架！），只要一有件好事（至少對我嚟講），或者一件我想佢發生嘅事，明明係99.99%發生硬架啦，都會因為我想下想下而冇咗。（所以我成日想chloe快啲有人要架！）

呢嗰時候，阿強又好似隻魔鬼咁走出嚟提我：「阿靜同momo，你會揀邊個？」

有得揀梗係揀……chloe啦！話哂做咗咁多年兵，做開有感情架麻！講笑啦，事實係，無論阿靜定係momo都好，冇咗隻game佢哋就係nothing。唔好話我有阿靜電話呀，曾幾何時有隻online幾乎全ser20大嘅電話我都有，晚晚電話講戰略添，一冇咗隻game，唔好話打俾大家，連m群都從此變得冷清……

但chloe唔同喎，識咗咁多年，我了解佢多過佢自己，莫講話佢幾時嚟m我都記得，就連佢未講出口我都知佢諗乜。我清楚佢清楚到……



「停停停！你唔好講到而家全世界都鍾意你，要你揀一個咁，而家只係問，如果阿靜同momo同時約你，你會揀邊個！」屌，我似覺得全世界都鍾意我咩？跟本就冇，係咪？

「應該係阿靜啦……」

「咁同momo講清楚，唔去睇戲啦！」

「真係講……？」

「唔好咁多籍口，講你就講。」



我深呼吸咗一下，打開momo嘅對話框：

「約咗人啦，sorry…」

「噢，咁算啦。」

就係呢日之後，momo開始少咗主動搵我。我唔知係好事定壞事，但起碼我可以應少個人，時間可以分返多啲俾chloe…同阿靜。

距離約會日期剩返兩日，但我嘅心情已經一日比一日激動。雖然真係只係約個普通網友睇戲，但話哂係個女仔，仲要係處女…（我認我就算呢一刻都係毫無邏輯地假定佢係靚女！）當然要尊重下佢，買過套衫啦！真係唔係我想咁緊張個約會，只係我冇理由真係著件霉過梅菜嘅衫，加條柒到無倫嘅褲去見人架？



考慮過我嘅自身形象之後，我打咗俾個又係打機識，但衣著十分mk嘅fd，阿樂。

「喂，阿樂，出嚟陪我買衫吖！」

「嘩，你有未期癌症呀？以前叫親你買衫你都唔肯，今日做乜鳩呀？」

我都幾乞人憎，做親啲反常嘢就俾人認為我有絕症，睇嚟搵要好好咁將佢哋再教育先得。

「屌你，出就出啦。」大家唔好成日睇我句句屌不離口，咁只係因為對住咩人應該要用咩方式啫，我真係好斯文架，求下你哋信我啦！

「得，3點mk等。」

同阿樂行mk，聽得最多嘅就係佢講自己食女無數，而我只係可以每日上「這個國家地理頻道」以減少街上嘅良家婦女被姦淫嘅機會……其實真係好難想像毒撚同mk點樣可以做朋友…

出到嚟，阿樂帶咗我去佢平時買衫嘅地方，但一行入去，我就感覺到全場嘅目光都移向我嘅方向。嗰嗰都面帶恥笑，同另一半係到竊竊私語，每間鋪頭嘅sales都冇人行埋嚟撩我入去睇，種感覺應該就好似第一日返工入錯公司咁……



行到去佢買開衫嗰間鋪頭，佢同個老闆娘好似好熟咁有講有笑，跟住仲叫老闆娘幫我揀套衫。望住成間鋪，好似冇一件衫係可以適應到毒撚嘅心靈咁。

「嗱，阿恆，唔洗怕羞架，慢慢揀啦。」

望住啲衫，就好似係啲衫揀我咁……經過咗成粒鐘，幾乎全間鋪嘅衫都俾我試均哂之後，我終於買咗套睇落最普通嘅衫。

買完衫之後，阿樂基本上可以話係功成身退，不過難得有人請食飯，我當然卻之不恭啦。

食完飯返到屋企，我係阿靜嘅msn status到見到一句令我好心虛嘅嘢……

「你照下塊鏡先啦，鍾意我，你憑咩呀？」

《一個毒撚就算打扮得幾新潮，骨子裡仍然係一條死毒撚……》