一次無心嘅表白，竟然令到佢同咗我一齊: 第九章

雖然我有幾分心虛，但都幾肯定呢句說話唔係話我。一來我都冇表白，二來我都冇鍾意佢（一定冇，除非有。）

正當我想問阿靜嘅時候，阿偉又打嚟。

「喂，你見唔見阿靜msn個status呀？」

「你唔係想同我講你同佢表白完，之後俾佢狠狠咁拒絕，而家深深不忿好憎佢呀？」

「唔係呀屌你，本身我諗住過幾日同佢表白架，點知見到句咁嘅嘢，你話而家點算啦……」



首先，男人老狗唔好屌嚟屌去啦，雖然你性取向模糊啫，我好清楚我係鍾意女架好冇！

「你咁啫係話阿靜嗰status唔係講緊你？」

「梗係唔係啦，我係佢面前都冇講過！除非你爆出嚟啦！」

咪住先，唔係阿偉，咁啫係仲有其他人追佢啦，佢唔係咁受歡迎呀……

「好似你咁得閒日日捕住佢咩！」



「唔係重點囉好冇，而家咁我仲點表白？」

「冇抵觸架，唔受佢唔代表唔受你架。」

「但佢講到樣衰勿近咁，我仲點會有機……」

都總算你有啲自知之明，不過睇嚟我都要照下塊鏡先……

「抵死架，柒毒學咩人自拍，仲要擺嚟做icon，你而家p下張相變黑白色，拎嚟做車頭相算啦。」



「咁我而家……」由於我真係冇乜興趣理阿偉，所以求其搵個籍口cut咗佢線。

我再次鼓起勇氣打開阿靜個對話框，點知原來見到佢之前留過言俾我。

「打俾你得唔得？」

我先係呆咗陣，之後話：「啱啱出咗街，做咩？」

冇幾耐阿靜就應機：「冇嘢啦。」

頂，明明有嘢又扮冇嘢，點解個個女仔都鍾意人哋氹佢講嘢架啫！（ok，fine，我認男仔有時都係……）

「講啦。」

「你睇唔睇到我個人信息？」



「見到啊，正想問你咩事？」

「啱啱有個勁煩嘅人同我表白囉。」

「挑，你咪又係睇樣，真係唔要得。」

「唔關事，係佢真係好煩，明明已經唔應佢，佢仲係咁煩我。」

咁煩到冇自知之明又係死罪嚟嘅……

「如果係靚仔煩你你就唔會咁講啦！」

「咁佢個樣都尚算普通，唔係話樣衰架喎。」



屌，唔樣衰都要叫佢照下鏡，咁我咪整容都唔掂……

「咁其實點解你唔試下同佢一齊？」

「冇呀，佢太煩，我最憎俾人煩！仲有，拍拖本身已經係一樣好煩嘅嘢，所以咪唔拍囉。」

如果個個死港女都好似你咁諗，應該所有紅燈區都排隊排到2036……

「條友都幾慘，聽完攪到我都唔敢同女神表白……」

「點解呀？」

「一間表白完，佢連叫我整容都慳返，直接去投胎，下世先返嚟搵佢，咁叫我情何以堪呢……」

「但你唔表白，你就只可以永遠睇住佢係人哋嘅懷抱入面架啦喎！」



之後我諗都冇諗過，就打咗句：「其實你係我女神嚟架，我鍾意咗你好耐架啦！」

《樣從來唔係問題，樣衰先係問題……》