一次無心嘅表白，竟然令到佢同咗我一齊: 第十三章

雖然阿靜約咗我下星期六出嚟食飯，但經過上次擺明有心放我飛機嘅經歷之後，我對呢次嘅約會都已經再冇任何期望。跟住幾日同阿靜就好似之前咁繼續傾計，或者完全唔在意，時間反而會過得愈快，唔經唔覺就過咗一個星期。

就係約會日子嘅兩三日前，我發現阿靜冇上過msn，第一日都冇為意，但第二日見佢都未上，因為自卑心作祟嘅關係，我開始懷疑佢封咗我。當我拉落去離線聯絡人個到，望住佢個status寫住：

「對不起，請原諒我逃避你的愛」

今次真係飛都唔洗買，我99%肯定阿靜呢句說話同我講，咁即係話星期六都係唔洗出嚟啦……算，反正冇期望就冇失望……

呢次，我真係少少失望都冇，因為我都冇信過佢……只係有啲無奈，係咪我一開始已經係錯……我唔應該講笑咁表白，我唔應該同佢曖昧，我唔應該在意佢……更加唔應該約佢出嚟……或者網友應該知道自己嘅位置只係網友，毒撚更加應該要清楚自己只可以安守本份……



自從阿靜封咗我，我嘅生活好似冇乜點變過，佢就好似從來都冇係我嘅生命入面出現過一樣。我依然過得好好……如果阿靜冇解封我嘅話……

到咗原定約會嘅星期六，我好清楚呢個約會唔再存在。

直到8月31日。

呢一日，我如常係屋企對住部電腦，唔知做乜咁無所事事，上網唔知睇緊咩，打機唔知打緊咩。打開msn，好自然咁留意個常用聯絡人入面阿靜嘅名。＜在線上>……吓，在線上？

我再細心望下佢嘅status：＜很想重回昔日友好關係> 



我望住個status，90度角話我知係講緊我，但……其實我又冇話絕交，一直都係佢單方面嘅問題，我而家搵佢咪仲怪？

係我猶豫緊嘅時候，阿強又走出嚟話：「呢條女一時又話約你，一時又放你飛機，封完你而家又話想做返朋友，仲想你自己送上門，我係你就唔忍啦，唔好理佢啫！」

咁又係我自己表白攞嚟衰在先嘅……

「就當今獲你衰，但都冇理由又係你自己搵佢嘅！」

「咁總有一個要搵對方架……」



「嗱，佢係status到打嘢俾你睇，你咪有樣學樣囉，講講下冇事架啦！」

聽完阿強建議之後，我真係開始係status到打咗句：＜這不就是你想要的結果嗎？>

隔咗陣，阿靜又改status：＜自作自受？>

我：＜一直只有你選擇這結果……>
靜：＜那麼，我們還是要當從來未認識過好了……>
我：＜我從來沒過樣想過……>
靜：＜那麼你想要怎樣……>

「……」玩改status都玩咗我哋成個鐘。

雖然我都肯定阿靜係回緊我，但始終咁玩法有兩個問題。一，改status係全部fd都睇到，即係chloe都會見到，我未想咁快斷咗條後路（雖然呢條叫死路）；二，咁樣講嚟講去都冇人用返對話框，始終都未算搵返大家，所以……



＜如果你一直係回緊我，就自己搵我啦。>

幾秒後msn就彈出阿靜嘅對話視窗。

「……」

「點解要避？我又冇話迫你應承同我一齊，做咩要攪到自己煩，我又唔好過啫。」

「sorry呀……係我問題……」

「你咩問題啫？」

「啊，唔知呀:$」

嗱，咁大個面紅嘅提示，咁都get唔到的話未免太反應遲鈍啦！



「不如俾我估下啦！」

「唔好啦:$」

「我諗大概應該係咁：
你：我好似鍾意咗個人呀
我：邊個呀
你：咪你囉衰人
我：我都鍾意你架
係咪咁呢！」

「:$」

「咁你鍾意我，我又鍾意你，你避咩啫！」



「唔知呀……」

「傻瓜！」

「哼:$」

「做我女朋友。」

「:$」

「咁啫係點啫？」

「你話點咪點囉:$」



「嗱，咁我當你應承架啦！傻瓜！」

就係我陶醉係呢段對話嘅時候，阿強又走出嚟話：「喂，仆街仔，你認真定玩架？chloe呢？」

「屌，你荒佢會認真咩，樣都未見過，我保證佢見到我之後，分分鐘屋都搬埋添啦！網戀開心完咪算囉！」

當時嘅我，曾經好天真咁以為，所有嘢都undercontrol…

總之2011年8月31日…我終於拍拖啦！（好似係…）

《當自以為所有嘢都係控制之內嘅時候，正正係自己最大破綻嘅時候……》