一次無心嘅表白，竟然令到佢同咗我一齊: 第十五章

我諗咗成晚，其實終有一日我都要蒲頭，醜婦終須見家翁，柒頭永遠做唔到人哋老公。我可以避到幾時啫，唔通可以避到有日瞓醒突變咗又靚仔又有錢嘅二世祖咩。

第二日，我同阿靜照常咁傾計，佢冇提起中秋件事，咁我梗係當冇事發生先架啦。點知原來我太高估自己嘅90度角……

「你記唔記得你應該有嘢要同我講架呢？」

挑，你唔問，唔通自己講嚟捉蟲咩。

「記得……」



「咁你一路唔講？」

「咁我見你冇提起吖麻……」

「咁夠冇人提你呼吸啦，你又識？」

「係係，我錯……咁幾多號幾點？」

奉勸所有男人一句，同條女嗌交，永遠唔會贏，嗌贏咗，你就會輸咗條女，所以道歉只係顯示出我哋男人嘅大方，絕對唔係承認失敗嘅行為嚟！



「12號，你夜晚幾點ok？」

「9點後，要做節。」係我send出去嘅同時，收到hailey電話。

「喂，講個好消息你知吖！」

對我嚟講除咗李嘉誠宣佈將啲遺產俾哂我或者chloe鍾意我之外，好似冇乜其他嘢算係好消息。

「我中秋出得街呀！」電話入面傳嚟chloe把一聽就知開心到發癲聲，唔洗問都知又三線緊俾我啦……



「其實正常人中秋出得街又真係唔洗咁興奮，不過當然你呢啲國家重點保護動物另作別論。」

「咩啫，好難得媽媽俾我哋中秋出街架！」

嗱，事源是咁的：多年前我哋三個已經想中秋出嚟玩，但唯獨chloe屋企唔俾。係我哋百思不得其解嘅時候，chloe講咗個令我迷上加迷嘅答案----媽媽話中秋節會失身架！

吓？！平安夜失身就話由細聽到大啫，中秋失身？！失俾邊個呀？粗壯牌蠟燭呀？真係咁保護個女，街都唔好俾佢出啦，成條街又多色狼，又多戀童癖，而且chloe身邊仲有隻識講人話嘅禽獸添。其實我諗咗咁多年，終於得出一個結論去解釋呢句說話，就係chloe阿媽就係係中秋失身嘅。

但係而家唔係研究chloe阿媽失唔失身嘅問題，問題係做乜撚嘢成日要我揀先…你好地地，冇街出咁多年，唔差在守多年身啦…係要攪著我。

而家我眼前突然多咗個異變數係到，我一揀錯分分鐘見唔到中秋嘅月亮。

「咁你想點吖？」

「我未試過玩蠟燭架，嗰日一定要玩返夠本！」



其實山頂蠟像館都可以玩蠟整蠟手，仲安全好多，做咩要玩我呢……

另一邊廂，阿靜又話：「bb，你可唔可以應承我到時唔發脾氣呀？」

乜我似eq好低咩而家……玩咩要玩到叫我唔好發脾氣……

「做咩講到咁嚴重？你哋有幾多人先……」

「冇呀，得我同另一個fd咋麻，不過佢有嚴重公主病，把口仲衰過你，我怕你會同佢嘈……」

我頂丫，我把口好衰咩？我明明就好有口德，咁睇我都有嘅……

「放心啦，我唔會同佢嘈嘅。」



「咁到時你嚟到地鐵站打俾我，我嚟接你吖。」

今次仆街啦……乜我有應承過咩……咁chloe點算呀……

聽住電話入面，hailey同chloe嘅內容都離不開chloe對中秋嘅幻想，我真係覺得我呢次玩完……

我試圖打斷佢哋興奮嘅對話：「如果我話我約咗人……你哋會點架……」

Hailey第一句就話：「乜仲會有人約你架咩？」

Chloe又話：「約咗邊個呀，推咗佢啦，乜有人重要得過我咩？」

頂，邊有人咁自大架（雖然係事實啫……），論重要性，我相信阿靜係比唔上chloe，但論可發展性，就算比chloe高出0.1個%都已經好多。即係我今次嘅約會唔單止係揀同邊個出街咁簡單，而係對自己嘅人格作出決擇，我要心靈上嘅交流，定係要肉體嘅享受？（雖然冇人保證同阿靜一齊可以發生到啲咩）

我為咗俾自己思考嘅空間，所以cut咗線，可惜個腦實哂，乜都諗唔到。



由於呢排揀嘢已經揀到我好煩躁，所以我需要從人哋嘅痛苦身上搵啲快感。

「嘟…嘟…」於是我打咗俾阿偉。

「喂，阿偉，多謝哂。」

「咩呀？」阿偉把聲百思不得其解咁問。

「如果唔係你，我都唔會識到阿靜，更加唔會感受到俾女溝嘅滋味。」

「咩話？阿靜溝你？你食錯藥呀？」

大家需要明白，我之所以要調轉哂啲嘢嚟講，係因為我作為一個黑到有pattern嘅地獄黑仔王，一旦期待或者希望或者帶有少少對呢件事有啲啲興奮嘅感覺的話，成件事就會冇得發生，由於我依然好想同阿靜繼續發展，所以我冇理由講事實出嚟架。



「你咪唔好信囉，啊，受唔受好呢？」

「屌，你條撚樣，佢點會溝你架，又唔係靚仔！」

「但我冇自拍，即係佢未知我咩樣。」

「挑，咁佢知咗咪一樣走頭，睇你風流得幾耐。」

「唔洗耐，起碼我有得同佢曖昧下，好過你連呢個機會都會，返屋企玩手指啦。」

雖然阿偉扮到滿不在乎咁，但明顯地，佢好不爽我，聽住佢啲咁葡萄嘅說話，真係將呢排啲煩腦暫時清空咗一陣。

或者我好變態，要咁嚟虐待人從而獲得快感，但每個人都有陰暗面架啦，差在幾時表露出嚟架啫。不過快感真係好快已經冇咗感覺，最後都係要乖乖地研究應該同邊個出去好……

《呢個世界上，只有一個女人你嗌交嗌贏咗佢都依然對我哋不離不棄嘅，呢個女人叫媽媽……》