係我高超嘅遊花園技巧底下,好成功咁將chloe約時間地點呢個問題拖到中秋當日。但任我口才再勁,都已經避無可避。

不過唔知好彩定唔好彩,阿靜一直都擔心我會同佢fd嘈,所以佢send咗條信息俾我:「bb呀,不如你今晚都係唔好嚟啦,我好怕你會同佢嘈呀……」

雖然呢條信息變相救咗我,但一樣還一樣,仆你個街,又玩我?毒撚好玩啲咩而家?

「得,我冇嘢好講。」

之後阿靜回咗句:「sorry呀bb。」



「你玩得開心啲,唔講。」

一來俾佢咁玩法,毒撚都有火啦;二來,我梗係打俾chloe約時間地點啦!!!

「喂,你今晚幾點ok呀?」

「唉,唔好提,我呀媽又反口。」

我瞇埋眼,深呼吸咗一下:「唔緊要啦……」



我都唔想自己咁冷靜,一時間係咁俾人約,一時間又俾兩邊放飛機。不過阿q有阿q精神,我都有黑仔精神,發生得係我身上嘅沒有最黑,只有更黑,想改變都改變唔到,唯有接受……

係俾兩條仆街放完飛機之後,呢兩日對人月兩團圓嘅幻想,鏡頭一轉就已經變咗人狗兩團圓。事關我屋企做節係去阿嫲屋企,而佢屋企又有幾隻狗,又唔知係咪因為我身上唔多唔少散發住啲佢哋同類嘅氣味,次次上到去都俾狗輪住上我……身上。

食飯嘅時候,其實從來都係長輩同長輩傾計,而我就同堂妹傾計。我堂妹叫阿宜,環觀全身,得個胸部有啲睇頭,不過由於由細睇到大,真係冇乜興趣。反之佢今日見到我一身嘅裝束而嚇咗跳。

「呀哥,你受咗啲咩刺激?突然執返個人樣出嚟嘅。」

我真係好感動,終於有人見完到我呢個新look之後第一句唔係咒我有絕症……



「挑,我之前唔執係廢時執完之後行出街攪到啲女排住隊問我拎電話,俾人告我阻街,我為咗大眾嘅利益著想先唔執咋!」

阿宜對住我表現完一個非常誠懇嘅微笑之後就繼續食飯,我相信佢應該好滿意我呢個答案。

過咗陣佢又問:「你一間有冇約人?」

「um…我個期本來已經排到2036,有35個港姐,89個女model等緊,但你係我個妹,如果你約我嘅我批准你插隊。」

「妖,你慳啲啦。」

「咁你係咪約吖,最後一次機會。」

「而家係本小姐俾機會你條死毒撚陪我去玩,唔係我約你囉好冇!」

「哦,咁我都係返屋企係張床到同月光玩遊戲算。」



「咁又唔好,我知你好好人嘅!」

「頭先又咁串。」

「係我錯,我細路女唔識世界,阿哥陪我玩得唔得吖咁?」

「你做咩咁折墮要我陪你呀。」

「無啦啦俾人放飛機囉,啲人有異性冇人性!」

仆你個街,明明句嘢唔係話緊我,點解我會好似feel到中咗槍……

「咁你想去邊玩?」



「返我屋企樓下啦。」

「屌你吖,你葵涌我東涌,做乜要就你去到海王星咁遠,好地地嫲嫲樓下咪算囉。」

就係咁,我俾阿宜捉咗落樓,沿途唔好毒撚露出葡萄嘅眼光,點解我隔離條女咁大波。但唔好意思,我真係乜feel都冇……

其實咁多年嘅中秋我都唔明,玩蠟燭同煲蠟嘅定義,明明我次次都係搵啲蠟燭圍一圈咁,但成日俾啲「食蕉」鬧,如果咁都叫煲蠟,咁係啲高級餐廳食燭光晚餐咪即係唆擺他人煲蠟縱火?

係我哋玩咗半粒鐘唔夠已經俾人話咗幾次,蠟燭又吹熄咗幾次,但吹熄嘅除咗燭光,仲有心情。我同阿宜坐咗係公園嘅長櫈到,望住個係到吹水,而我個腦就係到幻想住他朝一日,我都想同chloe……或者阿靜一齊咁做……

坐咗陣,阿宜醒起有個fd應該係附近玩緊,於是打咗俾佢。本應佢有fd陪我係應該返屋企瞓覺,點知佢死都唔放過我呢個老人家,係都要捉埋我去。

當我第一眼見到佢fd嘅時候,我完全了解到咩叫「一白遮三醜」嘅相反。全身皮膚黑到我以為佢讀國際學校,係菲律賓後裔。隻眼大就夠大啦,但凸哂出嚟,成隻金魚眼咁,好難想像阿宜話佢拍過不下數10次拖……我開頭未見佢之前以為係啲國色天香,但又濫交到無倫嘅mk妹,點知我嘅諗法有超過一半係錯……我調轉懷疑溝佢啲仔係咪咁飢不擇食呀……

之後我基本上已經唔記得做咗咩,大概都係我繼續我口賤嘅本能,佢哋講乜我都駁一餐,臨走仲俾個金魚眼問我拎電話……



過咗陣,就收到金魚眼嘅sms:「我係阿宜嘅fd呀,我叫雯雯呀。」

「嗯。」我唔係想hea,而係……我連hea佢都覺得廢時……

「咁冷淡架,頭先你都唔係咁架!」

「係呀,唔得閒,遲啲搵你。」當然我遲到2046都冇再主動搵佢啦。

呢晚返到屋企,我冇打開msn,因為我知阿靜佢會玩通宵……而我……繼續默念:

其實毒撚一個更開心…洗撚你講……

因為玩到好攰嘅關係(其實我唔知玩過咩,可能我老啦……),我連同chloe傾電話都冇心機,只係打咗去同佢交代聲我瞓覺先,就收咗線……



《其實只要將所有嘢睇輕啲,即使再壞嘅事發生係自己身上都可以心如止水,可惜係我心中嘅佢……太重……》