一次無心嘅表白，竟然令到佢同咗我一齊: 第十八章

到我起身嗰陣，見到阿靜已經上咗msn，但見佢冇send過信息嚟，我條氣又唔多順，所以上網睇柯南唔理佢。不過睇住柯南分別害死五條人命，同教唆他人偷竊從而俾自己破案之後，阿靜依然冇搵我。於是我開始愈諗愈嬲，直頭有衝動想封咗佢……

但係阿強又話：「你傻架，你當人哋唔洗瞓咩，你明知佢噚晚玩通頂，你唔俾佢開完電腦瞓咗架！」

雖然係事實嘅可能性幾高，但我唔評論個別事件。不過唔知個天係咪認為我份人太善良，所以好鍾意玩我，我由一起身就收到雯雯嘅sms：

「起身未呀？」「好悶呀……」「唔應人架……」「仲未起身？」由於研讀火星文需時所以我同柯南約會咗約幾粒鐘先回佢。

「起咗，做咩？」



「好悶呀……」

「你唔係上堂咩？」

「就係上堂先悶……」

「咁幫你唔到架。」

「陪我傾計。」



俾著平時如果同阿靜傾緊計嘅話，我真係唔會理佢，之但係今日我都好悶……

「嗯……」

不過與其話傾計，倒不如話做訪問仲貼切。雯雯一直問我鍾意食咩睇咩做咩……雖然有人對條毒撚主動係件幾開心嘅事，之但係對我主動嘅生物……問心，雯雯唔差架，只要個樣打哂格仔，全身用美圖秀秀p白返佢，其實不失為一個靚女……

但而家唔係講緊對住張相去性幻想，而係確確實實一個將「一白遮三醜」嘅反面演繹得淋漓盡致嘅小妹妹係到意圖flirt自己……雖然幼齒呢啲嘢一聽就充哂血啫，但望住佢多一秒我都驚陽痿……

唔記得俾佢訪問咗幾耐，我已經冇心去應佢。只係一直在意阿靜依然未搵我，個心開始掙扎緊，應唔應該主動搵佢，明明唔係我錯，做咩我要調轉做主動嗰個先……但係聽日就係阿靜生日，我咁少氣對件事又冇幫助嘅……



「喂，你真係唔搵我架喎！」最後，我都係屈服咗係阿靜嘅沉默手上……

「咁我唔知你嬲完未吖麻，咪唔敢搵你囉……」

Excellent！我完全搵唔到反駁嘅餘地……明明我好大方咁搵返佢，最後竟然好似係我錯咁……阿靜真係叻呀……

「咁你唔氹，我點嬲完！」

「我驚俾你鬧吖麻……」其實我真係唔明，邊忽會俾到種錯覺佢，我係好鍾意發脾氣架呢……

「咁你氹唔氹吖！！」

「bb唔好嬲啦……」fine，我輸……

「算你啦。係呢，你聽日應該都俾人約咗架啦可？」



「係呀，sorry呀bb……」

「咁算啦……」

「唔好咁啦……你攪到我好內疚……」

「咁你有冇少少時間落一落地鐵站，我俾啲嘢你吖！」

「得呀，俾咩我呀？」

「到時你咪知囉！」

「咁五點鐘地鐵站等吖。」



阿靜生日，作為「男朋友」嘅我當然要送返份生日禮物俾佢架啦，不過大家唔好對份禮物咁大期望，因為只係一張紙……

到咗第二日，我都係著返我唯一一套見得人嘅衫，嗰套為咗見阿靜而買嘅衫，終於可以發揮到佢嘅效用。

差唔多五點嘅時候我已經係某地鐵站嘅月台行嚟行去，途中當然唔少得欣賞女性呢個環節啦。行行下，見到有個女仔睇落好pure好ture，帶住眼鏡斯斯文文咁。嗰刻真係幻想過如果溝到佢就好……不過從來都係這些機會架啦……

過咗陣，我收到阿靜嘅電話，叫我上大堂嘅客務中心。

上完電梯，我開始掃視客務中心嘅位置，終於俾我見到。我行近嗰到嘅時候，見到一個好熟悉嘅身影映入眼簾，而且正正就係我頭先話如果溝到就好嘅嗰條女！佢就係阿靜！嗚呀~

我嘅心情又驚又喜，喜嘅係阿靜咁靚女；驚嘅係……我呢條毒撚，憑咩要佢鍾意我……

而家我得兩條路，一係轉身就走，一係走埋去俾佢恥笑幾句……但我為咗尊重阿靜……我決定走埋去……

「ha…ha …hello…」



「hello，你係阿恆？」

「係…呀…」

（造夢亦記得…與你初相見那十秒）

「又話有嘢俾我嘅？」

吓，咁都仲未調頭走？唔係覺得我有咩貴重嘢俾佢，想拎埋先呀……

我係個袋到拎出一個心出嚟……一個由紙摺成，上面寫住「我愛你」嘅心……

「嗯，咁我走先啦，拜！」



唉……睇嚟個心同呢段感情都要石沉大海架啦……

《由相識的一瞬間已經注定我要用一輩子去學習忘記你……》

][/url]