約完hailey之後,唔知點解我認為有必要同阿靜交代聲。唔好問我點解雯雯嗰次我唔講,因為我唔覺得雯雯任何一方面嘅地位可以威脅到阿靜(當然hailey其實都唔見得會……),總之我認為阿靜有權知道我嘅行蹤啦!

阿靜聽完之後話:「吓,仲諗住叫你星期六陪我睇添……」

「其實可以同你睇多次嘅,我冇所謂架!」你講到咁,唔通我唔怕會被消失咩…

「下次有機會介紹hailey俾我識吖!」

我不禁苦笑咗下……我嘅小寶貝阿靜……可唔可以俾返少少自信自己呢……



「好呀,有機會先吖。」

之後阿靜每隔幾分鐘就有意無意咁問起hailey嘅嘢,如果係男仔咁問我肯定條友想溝hailey!

基本上我係冇辦法勸服阿靜唔去胡思亂想,但其實無論係外貌抑或身材,阿靜都比hailey有過之而無不及,而hailey唯一比阿靜優勝嘅就只係5年嘅友情。

如果你問我阿靜同我呀媽跌咗落海救邊個先,我會好肯定救阿靜先,之後再跳落海同阿媽一齊死。但如果你問我chloe,hailey同阿靜跌落海我會救邊個先,個問題仲難拆解過亞視點計出收視比例同無線係成四六之比。但至少我敢肯定咁講一句,我同hailey跟本就冇可能,或者就如其他人所講咁,好朋友成為情侶,一但分手就會冇咗個最了解自己嘅人。

我哋三個識咗咁多年,對大家嘅熟悉程度已經去到當係一個話題入面,突然彈句:「你知我想點嘅!」然後其他兩個人已經心領神會。其實我好難想像如果有一日,生命中冇咗呢兩個咁了解自己,而自己又咁了解佢哋嘅人,生命係會變得幾咁毫無意義。



睇阿靜嘅行動,雖然未至於要我同hailey斷絕來往,但睇怕阿靜都已經將hailey列為危險人物……不過對於佢嘅做法,其實我覺得都幾窩心,至少從來未有女仔為我而呷醋先……

係24小時後,我又再一次身處係同一間戲院,同一個播放室,同一個位……唔同嘅係隔離嗰個至少有可以挑起我興趣嘅特質。

由於套戲其實已經第二次睇,所以我都冇乜心機睇,反而係到研究周圍嘅人。不過望嚟望去都係得十幾個人,直頭有種包咗場嘅感覺……可能呢樣就係點解個個都揀入嚟睇戲嘅原因……

我好記得戲入面有一幕係講dada嘅床戲,我見到前幾行有個男人係個女仔隔離耳語咗幾句之後,個女仔就僕低咗去個男人下面。我相信係個男人跌咗嘢,想個女仔幫手執架啫!不過唔知我又可唔可以跌咗嘢叫hailey執呢?

而睇到去一間club嘅除夕倒數嗰陣,個dj句對白係:「當我數到0嘅時候,攬住你身邊嘅嗰個錫落去!」



而當dj開始倒數嗰陣,我隻手開始慢慢由hailey膊頭掃到落佢條腰,到0嘅一刻,我哋嘅雙唇再一次碰上,不過今次,只係蜻蜓點水式嘅接吻,平淡得嚟又帶點心甜……

「死咸濕仔,有食唔食,罪大惡極呀,上次就話賓妹你唔啱啫,今次hailey,比上不足,比下卓卓有餘啦!仲有喎,你次次錫佢佢都唔反抗,佢可能對你有嘢呢,仲要揀你屋企附近睇戲,俾哂位你上啦!」阿強永遠都會係呢啲時刻去扮演佢魔鬼嘅角色……

由頭先嗰一kiss開始,我隻手一路都冇離開過hailey條腰,而佢都僕咗係我膊頭,直到套戲完我哋先再次出現返朋友間嘅嗰條界線……

一見完戲望返部電話,就見到阿靜嘅信息。

「好唔好睇?」

我諗都係冇嘢搵嘢嚟問多架啦……

「如果有你係身邊會更加好睇!」

Send完俾阿靜之後,我個腦不停咁浮現出頭先戲院入面執嘢執咗幾分鐘嘅女仔……



「唓,會架咩!」

會~!

係我身邊嘅hailey雖然見住我不停咁send信息,但一句都冇問過,只係見佢個樣有啲情緒低落……我唔知,都唔敢估原因……最後,hailey冇上到我屋企,我哋亦都冇食飯,睇完戲之後我就直接送咗hailey返屋企。

兩日後,就到我同阿靜約會嘅日子……好緊張,但又唔敢期待,好怕又俾佢放飛機……

《友情同愛情嘅界線好模糊,而偏偏好多人正正企咗係呢一個模糊點之上……》