一次無心嘅表白，竟然令到佢同咗我一齊: 第二十二章

連續睇咗兩日喜愛夜蒲，，加上視覺同身體上近排都受咗咁多刺激，我揀咗走堂留係屋企休息返日。雖則話休息，但啲紙巾唔知點解反而用得更加多…

諗返起近呢兩個月發生嘅事，好似好唔真實。明明我只係一個旁人不屑一顧嘅死毒撚，女神身邊一隻可有可無嘅二等兵，突然會有揀同邊個女仔出街嘅機會；突然俾個相識數年嘅姐妹錫咗啖；突然同個有如天使下凡般嘅女仔拍拖……一切一切就好似發緊夢咁……

不過同阿靜拍拖呢件事的確係好唔真實……見係見過，又真係確立咗彼此嘅關係，但實質連手指尾塊指甲都未掂過……真係拍緊拖……？定係阿靜從頭都尾都當係網戀……只係我諗得太多？

要解決我呢個疑惑就得返星期六嘅「約會」。

「老婆，星期六係唔係去睇戲？」我msn中問阿靜。



「係呀！你真係肯陪我？」

其實我諗無論客觀定主觀角度睇，有靚女約睇戲都真係搵唔到拒絕嘅餘地嘅！

「老婆叫到喎，梗係肯啦！咁你想邊到睇呀？」

「你之前講到你屋企個景咁靚，攪到我好想睇下呀，不如東涌啦！有戲院架可？」

你真係好彩啦，東涌呢個死城，三大銀行嘅分行都冇，但偏偏有間隨時可以以一張飛嘅價錢包場嘅戲院！



「上我屋企，好危險架喎！」

「我知你唔會嘅，我信得過你！」

望住空咗嘅紙巾盒……我都信唔過自己喎……

「咁你想幾點睇吖？」

「我搵下先……」「你講嗰間係唔係ua東薈城？」



「係呀。」

「咁聽日6點吖，你ok架可？」

吓……又東涌，又6點……睇套戲啫，唔洗咁啱呀……

「不如早啲吖！」

「咁2點啦。佢得呢兩場咋。」

都好，總好過同一套戲，同樣時間同樣地點，又有新女主角坐同一個位……

「咁聽日睇完戲上你屋企啦！」

唔知點解望住阿靜話要上我屋企，我個腦就冷靜唔到……其實我真係唔係咁咸濕架，要怪就怪人類嘅祖先啦！



今次雖然都唔敢抱太大期望，但偏偏成晚都輾轉反側，難以入眠。

當我係張床到「典嚟典去」嘅時候，阿強就話：「聽日如果佢上嚟，你會唔會食咗佢啫？」

我呢下真係俾阿強攪到哭笑不得，問埋啲心中答案同標準答案相違背嘅問題有咩作用呢……

我嘅標準答案係：我愛嘅係阿靜，唔係佢嘅肉體！

第二日起身，見到阿靜已經上咗msn，我一上線佢就問：「我幾點過嚟呀？」

我唔係發夢掛？今次冇放飛機，冇封我，確確實實咁話我知，我同佢嘅約會時刻就到！

「你幾點ok吖？」



「我12點過嚟吖！」

「好呀，我嚟荔景等你吖！」

好緊張……真係好緊張……好快就可以攪清楚我同阿靜嘅關係！

到咗約定時間，收到阿靜電話。

「我到咗啦，係邊呀？」

「我都到咗啦，係往東涌線嘅車頭等啦。」

行到去月台嘅車頭，見到阿靜上半身著住件黑色t-shirt，下半身著住條牛仔短裙加對厚底con's 。雖然咁著有啲mk，但加埋佢帶住嘅粗框眼鏡又不失佢斯文嘅氣質。

「hello…」



「hello！」阿靜雖然睇落都有啲怕羞，但點睇都冇我呢條死毒撚咁怕生…

我而家係咪應該要拖佢隻手呢……？萬一佢鬆開咪柒……再唔係佢叫非禮，以我副尊容，應該都好難甩身架喎……

於是我做咗樣好白痴嘅嘢……

「er…我可唔可以拖你隻手……」當時講完都真係想死咁滯……

「哈哈…傻瓜…」阿靜笑得真係好甜，直頭甜入我心。

「咁啫係…」

「嗯！」



係我伸手去拖阿靜嘅時候，完全感受到隻手係何等殭硬。

終於，我同阿靜10指緊扣。

「哈哈…你隻手好震呀！」

「你都係囉！」

之後我哋望住大家相視而笑。

由踏上呢程地鐵開始，我哋都開始咗我哋真正嘅戀人關係。

《可否讓我捉緊以後永不放手……》