一次無心嘅表白，竟然令到佢同咗我一齊: 第二十三章

我咁大個仔，除咗親人之外，都未試過拖其他女仔隻手。當我同阿靜十指緊扣嘅一刻，手心嘅顫抖完全反映出我個心係跳得幾快，呢種感覺比起同hailey嘅接觸更要大得多。嗰種由心開始擴散到全身嘅震動，令到阿靜係咁笑我……

「哈哈，傻瓜，你好緊張呀！」

而我只係識不停咁傻笑，諗起當時嘅畫面，不禁醒起去某啲工場做義工嘅時候，入面嘅服務對象……

「啊，係呢，你屋企近唔近戲院架？」

「ok啦。」



「你知唔知呀，我同我啲fd講今日上你屋企，佢哋個個都話實會有啲事發生，叫我做好安全措施喎，真係俾佢哋笑死！」

阿靜邊講邊笑，而且仲拖住我隻手係到搖，終於好成功咁令到我隻手冇再震。

「你啲fd冇講錯喎，只係點解你咁信我……？」

「唔知架，總之我信你唔你啲咁嘅人！」

哈…連阿靜對我嘅信任度都比自己高……都真係幾可悲…



一路上，我哋都係有講有笑咁，同對方分享過去，生活上嘅趣事，就好似一對好耐冇見嘅舊朋友一樣。有阿靜係身邊嘅時間都過得特別快，平日完全唔知應該點磨時間嘅車程，唔經唔覺已經到站。

我哋買完飛之後，仲有成個半鐘先入場，但又唔想係outlet到window shopping，於是阿靜話：

「不如而家上你屋企啦！」

聽完呢句之後，我個腦不停咁浮現出啲日本愛情動作片嘅畫面，啲傳教士呀，觀音呀，老漢呀不停咁係我腦海中閃過。

「吓，一間又出多次嚟呀？你唔怕麻煩咩？」



「有你陪我吖麻，唔緊要啦！」

雖然屋企好近戲院，但短短10分鐘嘅路程，我已經諗嘢諗到鼻血都差啲流埋。

返到屋企嗰陣，唔知點解個氣氛突然好尷尬，我哋就企咗係個門口到，相視而笑。

「er…er…隨便坐得架啦…」

「嗯…」

我同阿靜拖住手咁坐咗係梳化到，但尷尬嘅氣氛好似冇緩和過……

過咗陣，阿靜指住我個碟櫃問：「有咩碟好睇呀？」

雖然我平時冇買開啲愛情動作片，但個碟櫃啲碟都唔見得好正常，一係就係啲變態恐怖片，一係就兒時嘅卡通，再唔係就係俾我煲到爛咁滯嘅「鹿鼎記」，仲要分開兩套（梁朝偉版我呀爸嘅，張偉健版我嘅）。一直以嚟我都視韋小寶為偶像，明明係條古代mk，但都可以官至極品，妻妾成群，家財千萬，正一仆街嚟，不過我鍾意。



成屋最正常嘅應該都係死亡筆記動畫版同哈利波特，但阿靜竟然連佢最愛嘅哈利仔都唔睇，揀咗套變態殺人片。雖則套片唔係話好恐怖，但個凶手突然彈出嚟都咪話唔會嚇一嚇……

開頭我哋都只係拖住手，坐到好似兩國外交會面咁睇套戲，睇咗陣之後阿靜話：

「你唔係應該攬住我架咩？」

之後我慢慢伸手搭住阿靜膊頭，將阿靜拉近我身邊。第一次同阿靜咁近距離嘅我，聞到佢身上散發出一種自然嘅清香。雖然唔係第一次同女仔有咁嘅身體接觸，但可能由於阿靜嘅身份係女朋友，令我始終有種好緊張，好怕羞嘅感覺。

「傻瓜，你成個身都好震呀！」

但事實上我都feel到阿靜身體嘅震動比我有過之而無不及囉！

隻碟睇咗一半左右，我哋又出返去東薈城，睇返嗰套我已經睇第三次嘅喜愛夜蒲……



都話明第三次，我已經連幾時有咩對白都幾乎記得。當再次播到除夕倒數嗰幕，我並冇好似上次同hailey咁，錫阿靜，今次，只係輕輕咁攬住佢條腰，將佢靠近我身邊。

同一套戲，係第三次我先好似一個正常觀眾咁，冇過份凝視套戲，又冇對隔離嗰個發生太多動作，有阿靜係身邊，令我有種好沉實嘅溫馨感覺。

睇完喜愛夜蒲之後，我哋又再返屋企繼續睇返嗰套拉近我哋嘅電影。

今次，我又諗，一間會唔會可以有下一步行動呢……

《世上最幸福嘅事莫過於無論做任何事嘅時候，身邊總有一個人陪伴支持……》