一次無心嘅表白，竟然令到佢同咗我一齊: 第二十八章

當去到見到chloe同hailey嘅時候，唔知係咪自己心虛嘅關係（雖然唔知心虛啲咩），種感覺特別奇怪，嘢都唔太敢講多句。就係同佢哋食緊飯嘅時候，阿靜打俾我：

「hello~」

「係…你沖完涼啦？食飯未呀？」我絕對唔係因為心虛而拋咁多問題出嚟，只係我關心阿靜啫…

阿靜先靜咗兩秒，之後話：「食完飯好返屋企啦！你返屋企先打俾我啦，唔阻你哋啦！」

我頂…你裝咗針孔鏡頭係我個身咩，又知我食緊飯…



當阿靜收咗線，我同枱嘅兩位小姐又係到抽水……

Chloe：「wow，阿嫂打嚟！」

Hailey：「wu~真係呢，啱啱先見完，咁快又打俾你，真係so sweet架啫！」

唔知點解我硬係覺得hailey講親我拍拖嘅每句說話都酸過陳年酸醋……

基於阿靜都直頭落埋命令，而且仲好似有部鏡頭跟住我咁，我為咗唔俾我嘅甜夢咁快完結都係乖乖地咁返咗屋企。



返到屋企我第一時間打俾阿靜：「喂~」

「hello~食完飯啦？」

個潛台詞係咪表示我冇好嘅解釋係唔會有好結果咁話呀……？

「係呀……點解你會知嘅……」

「嘻~乜你有嘢唔見得光咩？咁驚做咩啫！」阿靜仲專登用把好可愛嘅聲音嚟講呢番說話……



救命呀……唔好再恐嚇我啦……我心血少唔嚇得架……

「冇…冇呀…咁我怕你會誤會咋麻，始終我以前都鍾意過chloe……」

「哦~原來你頭先同chloe佢哋食飯~」

吓…乜佢唔係知我同邊個食飯架咩…唔係喎，佢好似一路都冇講人物喎…頂…我明明聰明絕頂，咁都俾啲咁低級嘅迫供技巧陰到…除咗苦笑，我都唔知可以做咩……

「係…係…係呀……你唔會嬲架可……」

「嬲架！！！！！！！！！嬲你覺得我會咁小氣呀！」

啊！！！！！！！！我嘅小寶貝…我嘅女王…我嘅阿靜…唔好再嚇我啦…

「都知你冇咁小氣架啦！」



「不過如果再有下次一定要話我知先呀！」

「係係…」我唔講你都知架啦……

「仲有呀，以後聽電話嗰陣唔俾喂，要講hello！」

「點解呀？」

「我講得個喂好冇禮貌囉！」

「好…」自從呢日之後，除咗唔識嘅電話，我真係再冇喂過一句…

如果一個嬰兒到青少年時期嘅個個階段叫社會化，咁我覺得拍拖至結婚前嘅呢段時間可以叫做老婆奴化……



係同阿靜過咗兩日係屋企無所事事，唔知做乜嘅生活之後嘅星期一，落咗堂終於係約阿靜去行街。

不過我哋行街嘅定義，係真係係條街到行。無他嘅，係啲大型商場入面，見到嘅都係千遍一律嘅鋪頭，唔係賣衫就賣鞋，高檔啲嘅就珠寶首飾，作為學生嘅我哋，冇錢齋睇都冇意義嘅，真係寧願係街到欣賞下周圍嘅事物。

我帶咗阿靜返我以前小學附近，原來想俾佢睇下我嘅童年，但以前嘅玩具鋪都已經變哂大型連鎖時裝店……我當時係到諗，其實而家啲細路咁功利咁拜金，到底係家長定社會嘅錯……以前一放學，會幾個男仔一齊去玩具鋪到睇啲最新出嘅超人公仔，玩具鋪外一個又一個嘅爆旋陀螺盤，互不相識嘅小朋友，因為一場對戰而建立嘅友誼……

今日嘅小朋友一放學見到嘅就係以錢行先嘅鋪頭，機械式嘅笑容。以前大家會拎住手上嘅暴龍機，陀螺撩人對戰，互不相識都可以玩成個下晝，今日嘅小學生已經人人埋首自己嘅電話世界，連社交都出現問題，到底邊個嘅錯……？

搵唔玩具鋪，但至少仲有個公園。我哋坐係個千秋到，一邊盪一邊閒話家常，係金黃色嘅天空下，呢個曾經只係活係幻想中嘅畫面，今日竟然有機會實現，個心不其然泛起絲絲嘅溫暖。不過黃昏總係帶俾人一種淡淡嘅哀傷，又或者我個人比較多愁善感，望住阿靜唔知點解忽然有種失落嘅感覺……

可能阿靜都察覺到我呢點，所以走埋嚟我身邊，然後將個頭慢慢咁靠近我……

「啊…頂你…又吱我………」我又俾阿靜偷襲成功……

「傻瓜，笑返咪幾好！有咩唔開心記住同我講呀！」



我真係好慶幸有個咁善解人意嘅阿靜係我身邊……

我行埋去攬住阿靜，過咗陣…又到阿靜嗌救命啦！！！

「喂呀…成日…偷…襲人架…啊…」係呀，我又趁佢鬆懈嗰陣反擊啦！

我哋就係個公園到，你追我逐，直到街燈亮起先離開。

以往個公園一放學就有幾間學校嘅細路係到玩，但今日得返兩三個小朋友…唔知幾時連公園都已經變為歷史呢……

《我們總係活係過去嘅美好，忘記咗時間已經走到好遠……》