離開公園之後,我哋去咗附近嘅餐廳食飯。

阿靜望住個餐牌問我:「食咩好呀?」

其實就咁嘅,我係個有嚴重選擇困難症嘅人,揀餐廳嘅時候我已經揀咗成半粒鐘先坐到入而家呢到,而家又叫我揀食啲咩,想食宵夜定早餐先……

「你鍾意啦~」唔好叫我諗就得啦!

「但我樣樣都想食喎!」阿靜連皺紋苦思嘅樣都特別可愛過人。



其實就算到呢刻我都未想像到自己同緊個咁靚嘅女仔拍拖,幾日嚟,心頭都有種講唔出嘅激動,一諗起阿靜同我一齊緊就由個心到笑出嚟。

「咁咪叫囉。」

不過之後我好後悔講咗呢句……價錢唔係大問題,因為我哋只係係間小食鋪到食嘢,貴極都未及同chloe、hailey食餐板前嘅一半。問題係……阿靜真係乜都叫咗啲……而佢認為拍拖其中一樣嘅好處就係自己食唔哂嘅嘢有人包底……

食完飯,送到阿靜返屋企樓下嗰陣,我話:「不如聽朝一齊食早餐囉。」

「好呀,幾點吖?」



「8點你樓下等吖!」

「你得架啦?你東涌出嚟喎!」

「為咗見你,唔好話8點,通頂等你都得呀!」

「唓,你冇嘢叻架,最叻死剩把口!」

「係囉,個天就係俾我死剩把口嚟氹你囉~」



「係咩?咁chloe呢!」

屌…又講呢啲……

我指向阿靜身後:「啊,ufo呀!」

阿靜真係望咗過去……乜呢啲咁舊嘅橋仲有人信架咩……

我趁阿靜轉返塊面過嚟嘅一刻錫埋去……點知撞到個鼻………

跟住阿靜輕輕力咁拍咗我一下:「咦,好痛呀衰人!」

我作勢用手去摸俾阿靜打嘅嗰個位:「啊!救命……我中咗你一掌之後俾你震斷咗條氣管,而家抖唔到氣呀……我要人工呼吸呀…救命呀…哎呀…」

阿靜好得戚咁話:「抵你架!哼!」



阿靜話音未落我就將佢拉入我嘅懷中,好激烈咁錫咗幾秒…

「哼,衰人嚟架!成日蝦我!」

我為咗保命而做人工呼吸啫,邊有蝦阿靜啫,真係冤枉呀。

「咁我中咗掌吖麻,我為咗你唔會冇咗個好男朋友我先咁重視條命咋!」

阿靜惡咗我一下樣之後話:「唔玩啦,我返上去先啦,聽朝你起身記得叫醒我呀!」

「咁你早啲瞓啦,六點就會有奪命追魂morning call架啦!」

「咁你都係出門口先打嚟啦……」



而家啲細路真係呢,早啲起身都叫救命!早睡早起身體好呀,聽見六點鐘起身好似撞鬼咁!

第二朝,我係張床到迷迷糊糊咁聽到電話響……

一拎起身望…阿靜!?再望望個時間…7點半!!!!

自從離開中學之後,都未試過見到個鐘嘅時間不似預期然後再驚到呼吸都停頓咗幾秒…

「ha…hello…」

「你唔好話我知你仲係張床到呀!!!」

「塞緊車呀……」如果咁都信我會懷疑阿靜到底係咪地球人……

「聽講你搭地鐵架喎!塞車塞到連電話都聽唔到?!」



「唔係呀,我話塞緊車呢係指我啱啱諗住6點鐘離開個夢起身架啦,點知離開個夢條路好多人排緊隊走,排咗好耐先走到呀陰公!」

「好好笑喎!你講,噚晚幾點瞓?」

我望一望枕頭隔離嗰個斷哂電嘅屋企電話,睇怕又係同chloe傾電話傾到瞓著咗啦……

「其實我噚晚好早瞓架!不過自從離開咗中學之後好耐都未試過咁早起身,唔慣咋麻!」

「而家啲細路真係呢!早啲起身都叫救命!」頂,咁熟嘅呢句……

「係係,我錯…」

「咁而家點呀?」



「俾多個半鐘我,我即刻飛出嚟!」

「等得你出嚟我都夠鐘上堂!落堂先啦!!!」

《所有嘅承諾係兌現之前都係一個謊言……》