一次無心嘅表白，竟然令到佢同咗我一齊: 第三十八章

本身諗住同阿靜睇完醫生先返屋企，點知佢同我身邊啲異性「異星」生物一樣，係好抗拒睇醫生。唔通都市傳說話啲病人會俾醫生非禮係真嘅？如果係嘅有冇啲靚女醫務所介紹俾我，我三日唔埋兩日就會病一病架。

「唔睇醫生都得，不過一定要食藥！」對住唔肯返屋企，又唔想睇醫生嘅病人，呢個已經係底線。

「哦………」

係同佢搭地鐵嗰陣，我為免佢俾風吹到，所以基本上係用肥大嘅身軀將佢好似包住咁攬實，遠睇應該有幾分似啲變態色魔捉到獵物咁。

返到屋企諗住煲粥俾阿靜，等佢可以食藥，點知佢等都唔得就直接食咗藥再上床瞓咗…



我再一次細看阿靜熟睡嘅臉龐，白晢嘅皮膚上掛住個小小嘅黑眼圈……

突然阿靜雙手攬住我條頸，將我拉向佢到錫咗下，之後話：「都估到你架啦！」

「咁曳！病仲唔瞓！」

「哼，鬼叫你成日剩係偷望人又唔陪人瞓呀！」

「煲粥俾你大小姐食呀……」



「唔制呀，我要你陪我瞓！」

「乖啦，再曳嘅我幫你打針架啦！！！！」

「哼，又講衰嘢！唔理你！」

「乖啦，唔好嬲啦！」我爬咗上張床，從後攬住佢。

「哼！」



係呢個時候，我唯有駛出苦練多年嘅加藤鷹神之手…去「吱」阿靜。

「啊…衰人，次次都出呢招…」

「慘得過呢招次次work！」

「哼！」

「乖啦，我煲完粥上嚟陪你，你而家瞓先啦。」

之後，我真係好聽話咁，上咗床陪阿靜瞓。不過因為阿靜病緊，我係唔俾佢開冷氣開風扇，入到張被到原本已經好熱嘅我，好似入咗暖爐一樣…

其實咁熱已經好難瞓著，仲要而家攬住條女，生理反應都唔容許我瞓啦…開眼瞓咗兩粒鐘到，我叫醒咗阿靜起身食藥。

可能係個暖爐到真係太熱，阿靜嘅衫濕到透咗一半，白色嘅bra都變得若隱若現。汗水都令到阿靜白晢嘅皮膚更有光澤，真係少啲定力都想將佢推返落床，再探索人類宇宙起源嘅最終奧秘。



「嘩…你濕到…」我發誓呢句嘢只係形容緊佢件衫，絕對唔係形容緊佢其他部位。

「嗯…你有冇衫換呀，我換出嚟吹返乾佢先吖…」除衫…嘩，唔好話望，諗起都已經開始集中係身體某個地方…

「er…有嘅…」

係等待阿靜換衫嘅時候，我完全可以幻想到門嘅另一邊對眼球嘅刺激有幾咁大。

阿靜出到嚟，全身只係著住我件黑色裇衫，連條熱褲都除埋出嚟…雖然係咁，但有鑑於本人嘅身形較為肥大，條衫遮嘅位仲多過佢條褲…不過咁樣望落，又有另一番美感…

佢將啲衫拎俾我，叫我拎去晾乾佢嗰陣，我驚見入面有個bra。咁即係…阿靜而家真空…呢啲視覺同幻覺相互衝擊嘅享受實在太過份啦！你叫我仲點忍…

「咸濕仔，望咁耐架！」



齋望唔郁手已經好克制架啦…

「邊有啫！食嘢啦。」

話雖阿靜點著都靚，而且連身衫更加突顯阿靜嘅長腿。一邊食嘢，我就忍唔住一邊好光明正大咁偷望……

《發小野蠻嘅脾氣都不過為俾另一半氹，但如果另一半連氹你去維繫關係都認為係徒然嘅時候，離開係唯一選擇……》