一次無心嘅表白，竟然令到佢同咗我一齊: 第四十一章

其實如果你問我，呢個星期六日同阿靜係屋企有冇發生過啲激烈運動，我會話：「就算有會唔會周圍唱吖？」我會…但事實的確冇。

我哋好無聊咁又過咗一個周未。到咗星期一，我哋去咗尖沙咀海旁。係呀，你冇睇錯，又係海邊，我都話我份人悶到可能佛寺仲有趣過我架啦！

一踏足尖沙咀我忍唔住講咗句：「我明明冇過海關架，點解會返咗大陸嘅…」

「你肯定呢到仲係香港？」

「地域上係掛…我諗。」



由地鐵站開始沿路同阿靜傾計嘅時候都有種俾人用奇異眼光注視嘅感覺，佢哋嘅眼光彷彿講緊「香港人，你憑咩嚟呢到行呀，呢到已經俾我哋佔領咗架啦」之類嘅感覺。

平時同阿靜去親海邊，都總會搵到個只係得我哋兩人嘅地方，但係尖沙咀，你唔係每兩步俾人撞一次都已經要感謝上帝。

係呢個毫無浪漫可言嘅海邊，我同阿靜走咗入海港城入面。可惜呢到同其他大型商場一樣名店林立，跟本就唔係我呢啲窮苦學生應該出現嘅地方。除咗一間…

行到去地下嗰層，我同阿靜不約而同咁望咗大家一眼…

阿靜：「不如入去咯。」



正有此意。

於是我哋兩個超齡細路就走咗入玩具反斗城。

當然，因為真係超哂齡嘅關係，我哋完全唔知睇咩，之後阿靜提議：「不如玩僕哩哩咯！」

我先呆咗幾秒，然後不停笑阿靜好有童真…結果除咗手臂多咗幾個牙印，我亦都要做搵人嗰個…

「數一百下先準嚟搵呀！」



好！

「訓練有素嘅我真係認識咁數100下，一~十，二~十，三~十……………一百。」咩啫，唔怪得我架喎，真係數咗100下吖我。

結果唔係1分鐘，我就已經阿靜搵咗出嚟。咁快搵到佢並唔係因為我勁（當然唔排除呢個係主因）！而係因為佢自己企咗係到睇公仔…

「咪郁，你已經被包圍啦！精精地就當睇我唔到重新搵過！」呢句說話係阿靜拎住隻毛公仔嗰陣講嘅…

「um…呢到得你一個，點包圍呢？」

「呢到咁多隻公仔都係我嘅人！佢哋而家已經包圍咗你，你捉我唔到架啦！走吧啦！」

好…我輸…至奇！

「而家到你捉啦！！！」講完我即刻搵地方哩埋。



我係遠處偷望阿靜傻下傻下咁搵我嘅樣，帶住傻氣嘅外表令阿靜顯得更可愛。

幾分鐘過後，我見阿靜都仲未搵到，我就行咗出去搵佢。

點知一見到我，阿靜就話：「捉到你啦，你輸咗！」我即場灰哂…呢個故事教訓，捉個條友一日未認輸，一日都唔應該蒲頭，就算過隔離kfc食埋個晚餐再返轉頭哩埋都仲得！！！

玩完一輪，最後都係走返出去海邊吹風傾計。

當佢講起學校嘅嘢嗰陣，我真係將毒撚嘅所有怨念都幾乎爆哂出嚟，佢話：「今日啊邊個邊個係到同我鬥吱喎，點知佢唔怕吱嘅！」

嗰個阿邊個邊個係其中一個想溝阿靜嘅厹，係到我暫且稱呼佢為阿狗。當然阿靜佢嘅性格係呢方面都唔知佢扮無知定真係蠢，佢完全唔覺阿狗係厹，仲當佢係朋友，成日一齊玩。

「點解要咁玩？」我少有地一臉認真咁同阿靜講呢件事：「我而家話你知我唔撚鍾意第二個男仔掂你。」



「做咩啫…朋友玩下咋麻…」

「朋友？玩？我同hailey得閒無事又玩下攬頭攬頸，同chloe得閒玩下上床得唔得呀？一隻厹點flirt人我唔知？一隻厹點借機抽水我唔知？你係男人咩？」我已經盡量抑制住我嘅怒氣同聲線，但我諗周圍都唔少人聽到。

我講完之後阿靜沉默，而我都冇繼續出聲。

雖然之後一直拖住佢隻手送佢返屋企，但全程一句聲都冇出過……

《如果一個男人唔為你妒忌，你首先要懷疑佢係唔係真心鍾意自己……》