一次無心嘅表白，竟然令到佢同咗我一齊: 第四十四章

原本我一直諗住同佢哋講阿靜會上嚟，但我諗嘢永遠得個諗字，到咗4點左右，我個門鐘響起先同時提醒我，今次真係仆街了……

有女朋友以外嘅異性生物出現係我屋企都不再話下，甚至瞓埋係我張床到，呢次真係明明理直氣壯發脾氣都頓變成理虧嘅一方。

所以話吖，沉迷信長等於倒時間落海呀……

「喂，啦啦臨幫我清理現場，快，阿靜嚟架！」我呢邊叫chloe幫手執嘢，嗰頭就衝咗入房將hailey整醒，再唔理佢回到神未就已經將佢拉咗出廳。整個清場行動大概用咗6.4863秒就完成，我簡直係天才！

我一開門，阿靜就問：「點解佢哋會係到嘅？」雖然睇得出阿靜個心有啲醋意，但又因為噚晚嘅事又唔敢表現得太過。



「um…你問返佢哋啦…」嗱，真係唔好誤會呀！我有做過，你誤會我抵死，我乜都冇做過你誤會我就真係死不瞑目架！

Chloe將今日對我解釋嘅說話向阿靜解釋咗一次，唔同嘅係佢今次冇話係hailey拉埋佢嚟…

阿靜聽完個表情雖然好似幾滿意個答案，但受過咁多年睇女仔微表情訓練嘅我都心知不妙……

但係chloe同hailey又唔識做架喎，阿靜都上咗嚟，佢哋仲唔走，真係想打埋四圈先咩……

「唔該哂你哋幫我陪咗阿恆成日啦，你哋都攰架啦，不如返屋企休息下啦。」聽聽下我都以為佢係間屋嘅女主人…啲說話有骨到……



Hailey：「好啦，咁阿恆交返俾你啦！」

隨住佢哋出咗門口，我已經感受到背後極強嘅殺氣，不過我冇理由而家變死狗俾佢壓住嘅！

「你走堂佢哋又知嘅？」

「講咪知囉。」

「又會上埋嚟嘅？」



「佢哋頭先咪答咗囉。」

「你可唔可以唔好成日同佢哋咁close呀，盲嘅都睇得出hailey對你有嘢啦！」

「哦，你同你班擺明想溝你抽你水嘅厹close就係朋友，我哋close就有嘢，你再雙重標準啲。」其實呢番說話我已經盡量係用最平和嘅語氣去講，不過…

「咁你而家想點？」

「我唔要你再同佢哋玩得咁親密，避免哂所有身體接觸。」

「咁朋友玩下嗰陣實會有架啦…」

到低阿靜真係咁天真咁傻定為駁而駁，我唔知。我只係知我嘅煩躁已經去到極限，我將阿靜拉咗入房，強行除哂佢啲衫褲，完全漠視佢嘅感受…直到犯錯前一刻。我望到阿靜佢眼泛淚光，又委屈，又難受，又怕痛嘅表情…我前一刻一直發癲佢都冇出聲阻止我…只係默默咁承受…

望到個咁傻嘅阿靜，我離開咗張床，衝咗入廁所用凍水淋咗自己3分鐘至30分鐘，直到我完全冷靜為止。



出到嚟，我見到阿靜依然冇著衫咁瞓係我張床。

「冇事吖麻…？」呢個問題竟然係阿靜調返轉問我。

「sorry呀老婆……我唔應該發哂癲咁對你……」

「嗯…其實你可以繼續………」阿靜係我耳邊用微微嘅氣息嚟同我講。

「唔啦，我只係想攬住你…」

如果唔計我同阿靜都係赤裸嘅狀態，其實攬住佢，係張被入面涼冷氣，睇風景真係一種幾平淡嘅浪漫……

不過為免呀爸呀媽收工返到唔見到啲咁駭人嘅戰場，抖咗陣我哋就出咗去青衣食飯。而睇咗咁耐嘅你應該都估到飯後活動係咩架啦！係呀…就係行條海濱長廊呀！



我哋由一邊嘅盡頭行到另一邊，最後坐咗係啲長櫈到。

我指住深井嗰幾座樓：「將來我哋一定要住係嗰到，仲要係高層海景，之後開間細細哋嘅蛋糕店，係附近，返得又近，放工返嚟又有靚景睇，幾好呢！」

「唓，你有錢先算啦！」

「一定會有！」

「你睇你成日走堂，落堂又掛住陪我，點賺錢！」

「唓，將來一定得嘅~」

《我們曾經一起許下過很多承諾，最後只剩下獨自一人去將諾言兌現……》