一次無心嘅表白，竟然令到佢同咗我一齊: 第四十三章

第二日一起身就見到阿靜嘅sms：「今日我哋去邊呀？」

經過成晚嘅反覆思量，我無論嬲阿靜定同佢嗌交冷戰都對自己毫無好處，最後得益者只會係佢身邊嘅一大班厹。唯有慢慢靠洗腦計劃去令阿靜對身邊啲厹有咁避忌得咁避忌。

不過經過噚晚嘅事，始終冇乜心情出街，所以…「我今日走堂呀，你要見我放學就自己過嚟啦。」

Send完出去之後我就繼續攤係張床到…唔覺唔覺又瞓返…

「叮…噹…」門鐘聲嘈醒咗我，開頭仲係到諗，我唔係瞓咗咁耐呀。點知望一望個鐘，10點都未夠，阿靜唔係抄我橋走堂呀…



點知，係就係走堂呀，不過唔係阿靜，而係chloe同hailey…

我諗好多人都有樣好麻煩嘅問題，就係一瞓醒啲頭髮就飛哂起身，咁我冇理由俾我鍾意咗咁多年嘅人見到啲咁嘅樣架…

於是我隔住道門打咗俾佢：「而家你哋有兩條路，一係就企30分鐘，一係落去行30分鐘，我要洗頭。」

Chloe：「洗乜啫，你洗完都唔會變靚仔架啦！」

「咪嘈，我而家去洗，洗完打俾你啦。」



其實我完全唔明，而家咩事先，我有未期cancer？發下癲啫，就特登走堂嚟搵我，咁我病嘅話係咪搬埋嚟照顧我架？不過佢哋咁樣上嚟法，連埋阿靜真係連開枱都齊腳啦……

沖完涼換好哂衫，望一望個防盜鏡，佢哋仲係出面企緊。

我一開門chloe就話：「都話架啦，洗唔洗頭咪都係咁樣衰，男人老狗咁姿整做乜！」

「痴線，你哋先唔知做乜呀，晨早流流踩上嚟，你哋知唔知擾人清夢死咗要俾人燒乳房架！」

「收啦，如果唔係hailey知你走堂頹係屋企叫我陪佢上嚟，我真係咁得閒彩你呀！」



我望一望hailey，佢即刻話：「我廢時你係屋企發癲，掟爛哂啲嘢，激死你呀媽我先上嚟睇住你咋！」

其實我真係唔知佢哋上嚟做乜鳩…我有我打機，佢哋有佢哋睇電視，最多都係問下我同阿靜平時係屋企做咩…

Chloe：「你哋平時係屋企同而家我哋一樣咁無聊架？」

「咁兩個人係屋企你想有幾多姿多彩呀？」

之後Hailey問咗條好尷尬嘅問題：「你哋發展到咩程度呀？」

呢啲咁嘅問題，想我點答先，我哋發展得非常之好，基本上係可持續發展嘅，未來發展嘅趨勢係呈樂觀嘅狀態嘅！

「係張床到攬住一齊瞓囉，咁夠唔夠吖？」

Chloe：「你條死咸濕仔，俾你同佢瞓埋同一張床你會乜都冇做？」



嗱，我份人真係好誠實嘅，從來都唔講大話架！

「真係唔明，我明明就係一個乖學生，你講到真係有女出現係我屋企我都唔放過咁做乜啫，定係你而家就想俾我就地正法啫？」

但chloe真係唔知…呢個世界真係有一隻生物係幾乎出現係我屋企，而我確實冇辦法對佢產生任何性趣嘅呢……

拗拗下，我發現原來hailey瞓咗。乜我屋企而家真係咁好瞓咩？阿靜係咁，hailey又係咁，定係我間屋長期放迷煙架？

Chloe：「喂，抱hailey入你房瞓啦。」

「痴線，你唔抱？」

「玩呀？邊夠力呀？」



「咁你抬手我抬腳啦。」

「咁你不如直接拍醒佢叫佢入房瞓！」

於是我向hailey施展咗細個嗰陣呀爸呀媽係我身上施展，梳化瞓著，係床醒返嘅魔法。不過可惜，呢個魔法係失敗咗嘅，因為我就算訓練咗幾多次，依然都未可以令一個人安全咁抵達我張床。

碰撞中，hailey醒咗，不過我都冇即時放低佢，直至將佢拋落張床到。

我望住hailey，其實佢身邊都不乏追求者，外表又唔差，就係唔知點解冇拍過拖。一諗到佢又係一個萬中無一嘅未開發生物，我嘅思考系統又控制返我嘅行動。

我忍唔住又錫咗hailey一下，之後又走返出去繼續打信長發洩。

《最好嘅朋友係你唔需要出聲都知道你諗咩，有需要嘅時候隨時都會出現係你身邊嘅人……》