一次無心嘅表白，竟然令到佢同咗我一齊: 第四十六章

「唔得呀…我呀媽到而家都唔俾我出去過夜呀，如果我出去過夜佢一定成晚唔瞓等我返去架…」

我好耐以前已經係到諗，如果有一日起身，自己鍾意嘅人瞓係身邊，係一件幾咁甜蜜無比嘅事。但睇怕我呢個心願真係要等到同阿靜結婚嗰陣先得啦……

「咁好啦，不過…夜少少走都得掛！」

「得就得嘅，但而家連廳都唔出得，係間房玩咩…」

我指一指個天：「玩數星星！」其實而家要係香港睇到滿天星星都唔係咁易，但偏偏呢一晚，天公造美。我哋熄咗燈，一齊瞓係張床到望住個天，我從後攬住阿靜，電話播住我哋嘅主題曲…好想時間永遠停留於此…



過咗唔知幾耐，我又衰手多，係到「吱」阿靜，而阿靜又同我鬥「吱」。玩玩下，我隻手不安分咁去攪阿靜嘅敏感位置，但因為我呀爸呀媽又係屋企，阿靜要忍住唔出得聲，見住佢一邊用手摀住自己個口，一邊用另一隻手攪返我，個場面真係好好笑。結果玩玩下，我哋兩個由鬥「吱」變咗鬥忍叫聲，攪到咁上下，我feel到阿靜就快到極限，為免佢克制唔到叫聲，我停咗手。

我收手之後，阿靜好似窒息咗好耐咁不停抖大氣，而我就一邊望住阿靜一邊係到奸（淫）笑。

「衰人！成日玩嘢！」阿靜回完氣之後不停拍打我，但講嘢又唔敢太大聲，變相把聲因為抑壓而更顯嬌嗔。

「冇呀，幾時有啫，不過你頭先忍住唔叫嘅樣好可愛呀！」

「哼，你就開心得過啦，我忍得幾辛苦呀衰人！」



「唔好嬲啦，聽日俾你一次過叫返哂出啦，嘻嘻~」

「我先唔要，聽日唔俾你掂我，只有我可以掂你。」

「……」

就係我哋談心談得興起之際，門口外面傳嚟我呀爸把聲。

「夜啦，送人返屋企啦。」



雖則我同阿靜冇做啲咩唔見得光嘅嘢，但無啦啦咁俾人嚇一嚇真係個心都跳埋出嚟咁滯。

送完阿靜返去，我再返到屋企嗰陣，呀爸依然未瞓，個樣明顯等緊我返嚟咁。

爸：「咁嘅，你呀媽呢…佢就話喎…啫係呢…佢叫你玩還玩，要小心啲啫。」

我屌…兜咁耐都係想同我講叫我咪攪大阿靜個肚啫下話…而家連人類生命起源嘅探索之旅都未出發，莫講話發現有生命跡象吖…雖則不知者不罪，但佢哋而家咁嚟曲線抽我未起程去探索，真係令我有種想令全家上A1嘅衝動。

阿靜自從同咗我一齊之後，我屋企就好似變咗佢第二個家咁，一放假就會係我屋企到過。見過我屋企人之後，我哋除咗「玩遊戲」嗰陣要小心呀爸呀媽突然返嚟之外，基本上已經冇嘢驚。

阿靜係第二日照常上我屋企陪我發霉，跟住同平時一樣佔領我間房嚟瞓覺。而我，自從見過阿狗條信息之後，我開始趁阿靜瞓覺嘅時候睇佢手機，而且將平時同佢最多sms嘅人嘅電話抄低。雖然大部分都係女仔，但都見到唔少厹單向搵阿靜，作為一個毒撚男朋友，我都已經唔知應該嬲定自豪好……

係阿靜差唔多瞓醒嗰陣，我擺返埋佢部手機，繼而上床攬返住佢。跟住又係到無所事事咗一個下晝，又或者話，阿靜聽書聽咗成個下晝。我瞓咗係阿靜大髀上面，佢一邊係到玩我啲頭髮，我就一邊讀啲小說內容俾佢聽。

到咗夜晚，由於唔洗再怕見到呀爸呀媽嘅關係，阿靜繼續留係我到睇書，睇我嘅過去。當佢翻開我啲小學記念冊嗰陣，我好似感受到無比嘅殺氣係我身上閃過…



「啊，點解睇咗兩本都係女多過男咁多嘅？你讀女校架咩？」咁我講咗9億幾次，我係冇乜男仔fd架麻……

「係囉，一定係啲男仔懶得寫啦，哈……」

「咁又點解唔同女仔都祝你同唔同嘅人幸福架呢下？」

小學雞嘅帳都要拎出嚟計嘅話，咁唔差在幼稚園啦……而且只要阿靜心啲睇都會睇得出佢哋係夾埋玩嘢架啦…加上有一張直頭祝福我同我僅有嘅好兄弟百年好合添…呢單又唔見你算…

「老婆大人，唔係咁都有得秋後算帳呀…」

「問下咋麻，不過我又要寫！」

頂…阿靜都寫埋，感覺本記念冊突然變咗本集郵簿咁…



見到阿靜寫到興趣嗰欄，我忍唔住講咗句：「我知，打人同咬人！」

「乜你係人嚟架咩？」媽呀…我又俾人蝦呀…

寫到留言嗰一part，阿靜趕咗我出房：「唔準睇，今晚我返咗去先睇得！」

到咗差唔多11點，門口又傳嚟啲乞人憎嘅門聲，呀爸再次叫我送阿靜走…

我返到屋企，沖完涼先醒起阿靜嘅記念冊，我打開佢嗰頁，寫嘅係：

「bb，好想同你可以好似我哋嘅主題曲咁，海角天涯，一直到青春變成白髮，仍然以傻瓜相稱。」

呢一晚，我攬住本記念冊，默念阿靜我愛你，直至入睡。

《謝謝你曾經給我的溫柔，祝願你可以永遠幸福，希望平衡時空下的我倆依然相好……》